Գերմանիայում փոթորկի հետևանքով առնվազն 5 մարդ է մահացել (լուսանկարներ)
Գերմանիայի հյուսիս-արևմուտքում անձրևի, կարկուտի և ուժեղ քամու հետևանքով առնվազն 5 մարդ է մահացել, հայտնում է Взгляд-ը՝ հղում անելով Հյուսիսային Ռեյն- Վեստֆալիա շրջանի դաշնային ոստիկանությանը։
Եղանակային վատ պայմանները մի քանի ժամ կաթվածահար են արել երկաթուղային երթևեկությունը, ավտոճանապարհներին խոշոր խցանումներ են առաջացել։
Ուժեղ քամու պատճառով, որի արագությունը հասել է ավելի քան 40մ/վ-ի, Դյուսելդորֆ քաղաքի օդանավակայանում գիշերը մեկ ժամով չեղյալ են համարվել բոլոր թռիչքները։ Այնուհետև շատ չվերթներ իրականացվել են ուշացումներով։
Դյուսելդորֆում 3 մարդ մահացել է բնակելի տան վրա բարդու ընկնելու հետևանքով։ Փրկարարներին հաջողվել է փլատակների տակից դուրս բերել ևս 3 վիրավոր մարդու։ Քյոլնում մահացել է մեկ հեծանվորդ։ Էսսենում մեկ մարդ մահացել է, երբ փորձել է ճանապարհից հեռացնել ընկած ծառերը։
Երկրի հյուսիս-արևմուտքում շատ քաղաքների հասցված վնասի չափը ոստիկանությունը գնահատում է մի քանի հարյուր հազար եվրո։




















