ԱԺ «գազային» հանձնաժողովը երկուշաբթի կայանալիք նիստում վերջնական տեսքի կբերի իր միջանկյալ զեկույցը
Երկուշաբթի Ազգային ժողովի «գազային» հանձնաժողովը նիստ կգումարի և վերջնական տեսքի կբերի հունիսի 18 –ին մեկնարկելիք ԱԺ արտահերթ նստաշրջանում ներկայացվելիք միջանկյալ զեկույցի տեքստը:
Այս մասին Tert.am-ին հայտնեց ժամանակավոր հանձնաժողովի փոխնախագահ, «Բարգավաճ Հայաստան» խմբակցության անդամ Միքայել Մելքումյանը:
Հիշեցնենք, որ նա հայտարարել էր, որ այդ միջանկյալ զեկույցում քննարկվում է 4 հիմնական հարց. սպառողների շահերին առնչվող խնդիրներ՝ կապված գազի ներտնային սպասարկման ու հաշվիչների ստուգաչափման հետ, «Գազպրոմ»-ի նկատմամբ կուտակված մոտ 300 մլն. պարտքին վերաբերող հարցը, Հայաստանի՝ տարանցիկ երկիր լինելու պարագայում այլընտրանքային ուղիներին վերաբերող հարցը, և ամենածավալուն խնդիրը՝ գազի սակագնի ձևավորման հարցը և դրա ազդեցությունը էլեկտրաէներգիայի վրա:
Միքայել Մելքումյանը հայտնեց, որ այս նիստում կորոշվի նաև զեկույցի ներկայացման իրենց աշխատակարգը: Մասնավորապես՝ եթե լինեն տարաձայնություններ, թե զեկույցը բոլոր անդամների կողմից ստորագրվելուց հետո՞ է ներկայացվելու ԱԺ, թե՞ կից ներկայացվելու են նաև առարկությունները:
«Այդ բոլոր հարցերին երկուշաբթի կանդրադառնանք»,-ավելացրեց Միքայել Մելքումյանը:










