Հայաստանում մարդու իրավունքների, խոսքի ազատության և մի շարք այլ ոլորտներում ակտիվ պայքարի համար մրցանակներ շնորհվեցին

19:17 • 19.06.14

Համընդհանուր իրավունքների մրցանակաբաշխության շրջանակում այսօր մրցանակներ ստացան անձինք ու կազմակերպություններ, որոնք պայքարում են Հայաստանում մարդու իրավունքների, հաշվետու կառավարման, քաղաքացիական ակտիվության, տեղական ինքնակառավարման ոլորտի բարեփոխման, համայնքային ծառայության և ազատ խոսքի խթանման համար: Մրցանակաբաշխությունը կազմակերպել էին ԱՄՆ դեսպանատունը, Հայաստանում Եվրամիության պատվիրակությունը, Բրիտանական դեսպանությունը, ՄԱԿ-ի հայաստանյան գրասենյակը և Քաունթերփարթ ինթերնեյշնլ կազմակերպությունը: 

Մրցանակ շնորհվեց 7 անձի ու կազմակերպության: «Ազատության պաշտպան» մրցանակը շնորհվեց իրավապաշտպաններ Արտակ Զեյնալյանին և Արա Ղազարյանին՝ մարդու իրավունքների պաշտպանության մեջ նշանակալի ջանքերի համար:

Արտակ Զեյնալյանը նշեց, որ մրցանակը հեղինակավոր է ու պարտավորեցնող, որովհետև դրան արժանացել են բազմաթիվ իրավապաշտպաններ, ովքեր կարող են օրինակ ծառայել շատ սկսնակ իրավապաշտպանների:

«Կարծում եմ, որ սա կանխավճար է այն ամենի համար, ինչ մենք առաջիկայում անելու ենք: Մենք՝ իրավապաշտպաններս, շատ քիչ ենք: Պաշտպանում ենք այլոց իրավունքները, մարդու իրավունքները: Պաշտպանե՛ք ձեր իրավունքները, որ մենք անգործ մնանք»,-ասաց նա:

«Քաղաքացիական ակտիվություն» մրցանակը շնորհվեց «Չենք վճարելու 150 դրամ» քարոզարշավի կազմակերպիչներին՝ հանրային որոշումների կայացման մեջ թափանցիկության և հաշվետվողականության հետապնդման նշանավոր ջանքերի համար:

«Խիզախ կին» մրցանակը շնորհվեց «Կանանց ռեսուրսային կենտրոնին»՝ կանանց իրավունքների ու գենդերային հավասարության խթանմանն ուղղված համարձակ պաշտպանության համար: Կենտրոնի ներկայացուցիչ Լարա Ահարոնյանը նշեց, որ ինչպես ամենուր իրավապաշտպանները, այնպես էլ իրենք, պայքար են մղում: «Նախ պայքար ենք մղում որպես ակտիվ կին այն հասարակական միջավայրերում, որտեղ մեզ թույլ չեն տալիս մուտք գործել»,-ասաց նա:

«Մեդիա գերազանցություն» մրցանակը շնորհվեց հետաքննող լրագրողների «Հետք» ասոցիացիային՝ հետաքննական լրագրության և մարդու իրավունքների լուսաբանման մեջ լրատվական պրոֆեսիոնալիզմի համար:

Բանակում մարդու իրավունքների առաջխաղացմանն ուղղված նշանակալի ջանքերի համար «Կառավարման բարեփոխիչ» մրցանակը շնորհվեց Պաշտպանության փոխնախարար Դավիթ Տոնոյանին: Քարահունջի բնակչության առաջնորդման գործում իր նշանակալի ջանքերի և համայնքը առավել բարեկեցիկ դարձնելու համար «Տեղական կառավարման բարեփոխիչ» մրցանակին արժանացավ Քարահունջի համայնքապետ Լուսինե Ավետյանը:

Վերջին՝ «Համայնքային ծառայություն» մրցանակին արժանացավ Երևանի մանկական վերականգնողական կենտրոնի տնօրեն Լաուրա Մովսիսյանը՝ հաշմանդամություն ունեցող երեխաներին վերականգնողական ծառայությունների մատուցմանն ուղղված նշանակալի ջանքերի համար: