2013 թվականին փախստականների թիվը հասել է 50 միլիոնի. ՄԱԿ

11:22 • 20.06.14

Պատերազմների և հետապնդումների պատճառով բնակության վայրը փոխած մարդկանց թիվն անցած տարի գերազանցել է 50 միլիոնը: Այդ մասին հայտնել է փախստականների հարցերով ՄԱԿ-ի գործակալությունը, գրում է BBC-ի ռուսական ծառայությունը:

 

Դա Երկրորդ համաշխարհային պատերազմի ժամանակներից ի վեր ամենաբարձր ցուցանիշն է:

 

Մոտ 17 միլիոն մարդ փախել է իրենց երկրներից, 33 միլիոնից ավելի մարդ թաքնվում է սահմանների ներսում: Շատերը տարիներով ապրում են ճամբարներում:

 

ՄԱԿ-ում նշել են, որ փախստականների թվի ռեկորդային ցուցանիշները վառ օրինակն են այն գնի, որը ստիպված են վճարել կոնֆլիկտը կանխարգելելու անկարողության համար: Կազմակերպությունում նաև ընդգծել են, որ բարեկեցիկ երկրները պետք է ավելի շատ փախստական ընդունեն:

 

Ցուցանիշի աճի հիմնական պատճառը Սիրիայում շարունակվող պատերազմն է: Դրա հետ միասին փախստականների ընդհանուր թվի վրա ազդել են նոր կոնֆլիկտները՝ Կենտրոնաֆրիկյան Հանրապետությունում և Հարավային Սուդանում: