Թոնի Բլեերը Սադամ Հուսեյնի տապալումը չի կապում Իրաքի վերջին դեպքերի հետ. Financial Times

15:13 • 23.06.14

Մեծ Բրիտանիայի նախկին վարչապետ Թոնի Բլեերը Սադամ Հուսեյնի տապալումը չի համարում Իրաքում նոր ճգնաժամի պատճառ. այդ մասին գործիչը գրել է The Financial Times-ում հրապարակված հոդվածում, փոխանցում է gazeta.ru-ն։



Բրիտանիայի նախկին վարչապետը ենթադրում է, որ «Իրաքի և Լևանտի իսլամական պետություն» խմբավորումը վերստեղծվել և իր գործունեությունն Իրաքում վերականգնել է սիրիական ճգնաժամի «քաոսի» հետևանքով։ Բլեերի խոսքով՝ Սիրիայում քաղաքացիական պատերազմը նման խմբավորումներին թույլ է տվել ոտքի կանգնել։ «Արևմտյան երկրների չմիջամտելը հետևանքներ ունեցող որոշում էր»,- վստահ է գործիչը։

 

Բացի այդ, Բլեերը կարծում է, որ չի կարելի վերլուծել Մերձավոր Արևելքի ներկա վիճակն առանց արաբական հեղափոխությունների ազդեցությունն ուսումնասիրելու։ «Տարօրինակ կլիներ կարծել, թե հեղափոխությունը չէր հասնի Իրաք»,-ասել է նախկին վարչապետը։
 

Նրա խոսքով՝ առկա մարտահրավերների պատճառները 2003թ.-ին (Սադամ Հուսեյնի տապալումը) կամ 2014թ.-ին ընդունված որոշումները չեն։ «Դա իսլամական ծայրահեղականության մարտահրավերն է։ Այն գլոբալ է, և մենք դրանից խուսափել չենք կարող»,-հավելել է նա։

 

Գործիչը եզրափակում է՝ գրելով, որ ծայրահեղականներին չեն աջակցում մուսուլմանների մեծամասնությունը, ինչի մասին վկայում են Իրաքում և Աֆղանստանում կայացած վերջին ընտրությունները։ «Այդ մարդիկ ցանկանում են ազատ լինել՝ ազատ միապետներից և ազատ ահաբեկչությունից։ Նրանց հաջողությունը մեր շահերից է բխում»,-ասել է Բրիտանիայի նախկին վարչապետը։

 

Ավելի վաղ Բլեերը հայտարարել էր, որ Իրաքում անկարգությունների պատճառն արևմտյան երկրների անընդունակությունն է՝ միջամտելու սիրիական հակամարտությանը։ Բրիտանիայի նախկին վարչապետը ժխտել էր, որ երկրում խնդիրների պատճառը 2003թ.-ին Իրաք ներխուժումն էր։