Դետրոյթի ակտիվիստները դիմել են ՄԱԿ՝ քաղաքի իշխանությունների վրա ճնշում գործադրելու համար
Հասարակական ակտիվիստները մարդու իրավունքների խախտման համար մեղադրել են ամերիկյան Դետրոյթ քաղաքի կոմունալ ծառայությունների աշխատակիցներին, որոնք սպառնում են անջատել մոտ 3.000 բնակչի ջրամատակարարումը։ Ակտիվիստները դիմել են ՄԱԿ՝ խնդրելով պարզել իրավիճակը, գրում է Russia Today-ը՝ հղում անելով Al Jazeera հեռուստաալիքին:
Detroit Free Press-ի տվյալներով՝ քաղաքում ջրամատակարարման միջին ամսական գումարը 75 դոլար է, մինչդեռ ԱՄՆ-ում այդ ցուցանիշը միջինը 40 դոլար է: Անցած շաբաթ կոմունալ ծառայությունները հայտնել են, որ պատրաստվում են բարձրացնել գինը գրեթե 9 տոկոսով:
«ԱՄՆ-ն միջազգային պարտավորոթյուններ է ստանձնել մարդու հիմնարար իրավունքներից մեկն ապահովելու հարցում, այն է՝ խմելու ջրի հասանելիության իրավունք: Սակայն այստեղ խախտվում է այդ իրավունքը: Մենք խնդրում ենք ՄԱԿ-ին ճնշում գործադրել ԱՄՆ-ի և Միչիգան նահանգի իշխանությունների վրա, որպեսզի նրանք սկսեն ինչ-որ բան անել Դետրոյթում այդ խնդիրը լուծելու համար»,- ասել է կանադական Blue Planet Project հասարակական կազմակերպության ներկայացուցիչը:
Բողոքով նամակն արդեն ուղարկվել է անվտանգ խմելու ջրի հասանելիության հարցով ՄԱԿ-ի հատուկ զեկուցող Կատարինա դե Ալբուկերկեի անունով:










