Հուլիսի 1-ին Հայաստանը չի ստորագրի ԵՏՄ անդամակցության փաստաթուղթը. Ալեքսանդր Իսկանդարյան
«Կովկաս» ինստիտուտի տնօրեն, քաղաքագետ Ալեքսանդր Իսկանդարյանի կարծիքով՝ Հարավային Կովկասում ոչ մի աշխարհաքաղաքական զարգացում էլ տեղի չի ունենում, բայց մի կողմից էլ իրաքյան իրադարձությունները, մյուս կողմից սիրիական դեպքերը, որին խառնված է Թուրքիան, մյուս կողմից էլ Իրանի հետ կապված զարգացումները խոշոր հաշվով չեն կարող ազդեցություն չունենալ մեր տարածաշրջանի վրա:
«Իրականում հայկական կողմն այս պահին ճանապարհային քարտեզ է մշակում, կամ այլ կերպ ասած՝ իրավական փաստաթղթեր է պատրաստում Եվրասիական տնտեսական միությանն անդամակցելու համար,- ասաց քաղաքագետը, սակայն նշեց, որ կասկածում է, որ հուլիսի 1-ին կստորագրվի ԵՏՄ-ին Հայաստանի անդամակցության փաստաթուղթը, քանի որ կան տեխնիկական խնդիրներ, ինչպես նաև խնդիրներ՝ ԵՏՄ հիմնադիր երկրների միջև։
Քաղաքագետի գնահատմամբ՝ Հայաստանի և Թուրքիայի միջև ֆուտբոլային դիվանագիտության ձախողումը պայմանավորված էր Թուրքիա պետությունով, դա թուրքական ներքին քաղաքական խնդիրների հետևանքն է:
Անդրադառնալով այս օրերին ՌԴ արտգործնախարար Սերգեյ Լավրովի՝ Հայաստան կատարած այցին, Իսկանդարյանն ասաց, թե հայ և ռուս էլիտայի միջև միշտ էլ խոսելու բան կա, բայց այս այցը հերթական, սովորական այց էր:
«Ռուսաստանի համար Հայաստանն ու Ադրբեջանը սիամական երկվորյակներ կարծես լինեն: Եթե նրանք վերցնում են Հայաստանին, պիտի վերցնեն նաև Ադրբեջանին՝ հավասարակշռությունը պահպանելու համար: Ադրբեջանը շատ կարևոր երկիր է Ռուսաստանի համար»,-ասաց քաղաքագետը:










