ՔՕ-ն մինչև 5 տարի ազատազրկում է նախատեսում մշակութային հուշարձանի ոչնչացման համար. ՀԽ անդամը՝ Աֆրիկյանների տան մասին
Այն մարդը, ով ձեռք կբարձրացնի հայկական պատմամշակութային արժեք ներկայացնող որևէ հուշարձանի վրա, հայ չէ, լինի ղեկավար թե շարքային քաղաքացի կամ մասնագետ: Tert.am-ի հետ զրույցում Աֆրիկյանների տան քանդման վերաբերյալ իր անձնական կարծիքը հայտնեց Հանրային խորհրդի կրոնի, Սփյուռքի և միջազգային ինտեգրման հարցերի հանձնաժողովի՝ պատմական-ազգային արժեքների, հուշարձանների պահպանության, պատկանելության և օգտագործման խնդիրների ենթահանձնաժողովի նախագահ Ժասմեն Ասրյանը:
Նա նշեց, որ իր համար դադարում է գոյություն ունենալ այն մասնագետը, որ նման բան կանի, որովհետև նա, ըստ տիկին Ասրյանի ձևակերպման, իր մասնագիտությունն օգտագործելով՝ ծախում է իր պատմությունը:
Նշենք, որ վաղը Հանրային խորհուրդն անդրադառնալու է Աֆրիկյանների տան խնդրին, բայց Ժասմեն Ասրյանը կրկին ընդգծեց, որ ասվածն իր անձնական կարծիքն է:
Ժասմեն Ասրյանն այս համատեքստում հիշեցրեց նաև, որ Քրեական օրենսգրքում կա համապատասխան ՝ 264-րդ (Պատմության և մշակույթի հուշարձաններ ոչնչացնելը կամ վնասելը) հոդված, որը մինչև 5 տարի ազատարզրկում է նախատեսում մշակութային հուշարձանի ոչնչացման համար:










