ՌԴ Սևծովյան նավատորմը լայնամասշտաբ զորավարժություններ է սկսել
Այսօր սկսվել են Ռուսաստանի Սևծովյան նավատորմի ուժերի ռազմածովային վարժություններ մոտ 26 ռազմական նավերի և օժանդակ նավերի, 20-ից ավելի ինքնաթիռների և ուղղաթիռների, ծովային հետևակի և ցամաքային հրետանու մասնակցությամբ, հաղորդում է ИТАР-ТАСС-ը:
Ռուսաստանի պաշտպանության նախարարության մամուլի ծառայությունից ИТАР-ТАСС-ին հայտնել են, որ զորավարժությունների տարածքն ընդգրկում է Սև ծովի ողջ ավազանը:
Պլանային մարտավարական զորավարժությունների ընթացքում Սևծովյան նավատորմի ուժերի համատեղ գործողությունները սկսվել են ծովային և օդային թիրախներով հրթիռահրետանային կրակոցների արձակմամբ:
Ավելի վաղ հաղորդվել է, որ Սև ծով է մտել ՆԱՏՕ-ի նավերի խումբը՝ Բուլղարիայի ափերի մոտ «Բրիզ-2014» ռազմածովային ուժերի միջազգային զորավարժություններին մասնակցելու համար:










