Էներգացանցերը պարտավոր են վերանորոգել հոսանքի տատանման դեպքում շարքից դուրս եկած սարքերը. Ա. Պողոսյան

10:51 • 14.07.14

Էներգացանցերը պարտավոր են սեփական միջոցներով վերանորոգել հոսանքի տատանման դեպքում շարքից դուրս եկած կենցաղային սարքը, իսկ եթե դա անհնար է՝ փոխհատուցել:


Այս մասին Tert.am-ին հայտնեց «Հայաստանի սպառողների ասոցիացիայի նախագահ» Արմեն Պողոսյանը:


«Իրենք պատասխանատու են, բայց դա պետք է ապացուցել: Իսկ ապացուցելը շատ հեշտ է, զանգարահում ես, լինի գիշեր, թե ցերեկ, իրենք ունեն հերթապահություն, իրենց մոտ երևում է՝ որտեղ են տատանումներ եղել: Քայլ երկրորդ՝ եթե ՀԷՑ-ը համաձայն չէ, ապա անհրաժեշտ են նաև հարևանների վկայությունները, որ իրենց մոտ էլ ինչ-որ բան եղել է»,-նկատեց սպառողների իրավունքներով զբաղվող կազմակերպության նախագահը:


Նկատենք, որ վերջին շրջանում ՀԷՑ-երը շատ անսպասելի, օրը մի քանի անգամ կարող են անջատել հոսանքը, և շատ քաղաքացիներ տարակուսում են, թե եթե հեռուստացույցը կամ սառնարանը փչանա, ապա ո՞վ է փոխհատուցելու:


Արմեն Պողոսյանը հավելեց, որ միայն մեկ անգամ է եղել, որ բանը հասել է դատական պրոցեսին: