Եթե քառյակը իր խոստացած հանրահավաքը չարեց, ապա հերթական փուչիկը կպայթի. Անահիտ Բախշյան
«Ժառանգություն» կուսակցության անդամ Անահիտ Բախշյանը կարծում է, որ եթե քառյակը իր խոստացած հանրահավաքը աշնանը չարեց, քաղաքական առաջնորդները հարթակի վրա չեղան, ուրեմն հերթական փուչիկը կպայթի:
«Ընդհանուր քաղաքական մթնոլորտում սպասողական վիճակ է»,- Tert.am–ի հետ զրույցում ասաց նա:
Անդրադառնալով քաղաքացիական նախաձեռնությունների և քաղաքական ուժերի համագործակցությանը՝ Անահիտ Բախշյանը նշեց, թե, ցավոք սրտի, նման համագործակցություն չկա, և քաղաքացիական նախաձեռնությունների անդամները հայտարարում են, որ իրենք քաղաքական որևէ ուժի հետ չեն:
«Սակայն կա տարրական աքսիոմ՝ առանց քաղաքական ուժի երկրում որևէ փոփոխություն չես կարող իրականացնել»,- ասաց նա:
Անահիտ Բախշյանը քառյակի գործունեության վերաբերյալ նշեց, որ թեև համագործակցության կողմնակից է, սակայն կարծում է, որ այն պետք է արդյունք տա: «Բոլոր ներկայացրած տասներկու կետերը նվազագույն խնդիրներ են, սակայն նրանց մեջ նույնիսկ կուտակայինի դեմ պայքարը արդյունավետ չավարտվեց»,- ասաց նա:
Անդրադառնալով վաղը կայանալիք ՕԵԿ հանրահավաքին, Անահիտ Բախշյանը նշեց, որ կասկածում է, թե ՕԵԿ-ին կհաջողի հանրահավաքում համոզել մարդկանց իր ընդդիմադիր լինելու մեջ:
«ՕԵԿ-ը մոռանում է, թե անցած հինգ տարիներին՝ որպես կոալիցիայի անդամ, ինչպես է ավերիչ օրենքներին, նախագծերին քվեարկել: ՕԵԿ-ն ինքն իր դեմ է եղել, իսկ հիմա ցանկանում է իմիտացիա անել, թե իշխանության դեմ է»,- ասաց «Ժառանգության» անդամը:
Նա հայտնեց, որ ինքը հանրահավաքին չի գնալու: «Լսելու բան չունեմ և առավելևս ջղայնանալու առիթ չեմ ցանկանում ինձ ստեղծել»,-ասաց նա:










