ՈԱԱԿ-ը հետևում է հայկական 5 բուհերում որակի ներքին ապահովման համակարգի ներդրմանը

12:58 • 17.07.14

«Որակի ապահովման ազգային կենտրոն»-ը (ՈԱԱԿ) բովանդակային մշտադիտարկում է իրականացնում հայկական հինգ բուհերում` պարզելու որակի ապահովման ներքին համակարգի ներդրման արդյունավետությունը:


Ինչպես «Արմենպրես»-ին հայտնել են ՈԱԱԿ հիմնադրամից, ուսումնասիրվում են պլանավորված գործողությունները, դրանց իրականացման աստիճանը, փաստացի ձեռքբերված արդյունքները, թե որքանով են արդյունքները նպաստել տվյալ բուհի դրամաշնորհային ծրագրի նպատակների իրականացմանը:


Վազգեն Սարգսյանի անվան ռազմական ինստիտուտը, ԱԻՆ ճգնաժամային կառավարման պետական ակադեմիան, ԳԱԱ Գիտակրթական միջազգային կենտրոնը, Մովսես Խորենացու անվան համալսարանը և Եվրասիա միջազգային համալսարանը ՀԲ «Կրթության որակ և համապատասխանություն» վարկային երկրորդ ծրագրի շրջանակներում դրամաշնորհ են ստացել «Որակի ապահովման ներբուհական համակարգի ներդրման կամ դրա հետագա բարելավման նպատակով բուհերին դրամաշնորհների տրամադրման» ծրագրով:


Նախատեսվում է, որ դրամաշնորհ ստացած հինգ բուհերը 12 ամիս տևողությամբ ծրագրեր կիրականացնեն` ընդհանուր 4 փուլով: Հուլիսի 11-17-ը` գործընթացի երկրորդ փուլի ավարտից հետո, ՈԱԱԿ-ը նշված բուհերում մոնիտորինգ է անցկացնում` պարզելու, թե որքանով են արդյունավետ իրականացնում որակի ապահովման ներբուհական համակարգի ներդրման կամ բարելավման ծրագրերը:


Մշտադիտարկան արդյունքների վերաբերյալ հաշվետվությունը կներկայացվի «Կրթական ծրագրերի կենտրոն» ԾԻԳ-ին: