Առավել լուրջ խնդիրներ կան, քան նրանք, որ բարձրացնում է Լևոն Տեր–Պետրոսյանը. կարծիքներ

Հայաստանի առաջին Նախագահ Լևոն Տեր-Պետրոսյանի վերջին դիտարկումները հայ–ադրբեջանական սահմանագոտու միջադեպերի, ինչպես նաև Հայաստանի ներքաղաքական խնդիրների շուրջ արված մեկնաբանությունները տարակարծություն են առաջացրել քաղաքական դաշտում: Քաղաքագետ Աղասի Ենոքյանի կարծիքով՝ դա ընդամենը իշխանությանը քննադատելու քայլ է, իսկ «Ժառանգություն» կուսակցության փոխնախագահ Արմեն Մարտիրոսյանը համարում է տեղին մտահոգություն:

Առաջին նախագահի կարծիքը, թե շփման գծում Հայաստանը համարժեք պատասխան չի տալիս Ադրբեջանին, քաղաքագետ Աղասի Ենոքյանը չի կիսում: «Ես այդպիսի ինֆորմացիա չունեմ, թե Հայաստանը համարժեք պատասխան չի տալիս հակառակորդին, միգուցե, Լևոն Տեր-Պետրոսյանն ավելի շատ ինֆորմացիա ունի: Ես այնպիսի տպավորություն չեմ ստացել, թե համարժեք պատասխան չի տրվել, իմ կարծիքով՝ տալիս են»,- Tert.am-ի հետ զրույցում ասաց նա՝ ընդգծելով, թե դժվար է համաձայնել կամ չհամաձայնել առաջին նախագահի հետ:

Նա Լևոն Տեր–Պետրոսյանի այդ հայտարարությունը պայմանավորեց նրանով, որ ընդամենը իշխանություններին քննադատելու կարիք կար. «Քաղաքականության ամեն ձևն էլ ընդունելի է, և այդ ամենը պետք է թողնել Տեր-Պետրոսյանի քաղաքական բացատրությանը:

Ինչ վերաբերում է սահմանադրական բարեփոխումների վերաբերյալ Լևոն Տեր-Պետրոսյանի անդրադարձին, քաղաքագետը գտնում է, որ եթե Տեր-Պետրոսյանը հայտարարում է, թե ինչի շուրջ է գնալու ենթադրյալ աշնանային սրացումները և դրա համար ընտրել է սահմանադրական բարեփոխումները, ապա ինքը չի կարծում, թե դա ադեկվատ ընտրություն է։

«Բազմաթիվ ուրիշ խնդիրներ կան, ամենամեծ, հիմնական խնդիրը հենց այսօրվա հայ-ռուսական հարաբերություններն են, վաղը «Գազպրոմն» արդեն սանկցիաների տակ կհայտնվի, և այդ դեպքում մենք ինչպե՞ս ենք լուծելու մեր գազի հարցը, խայտառակ վիճակ է, Հայաստանում երկու խոշոր բանկեր փաստորեն արդեն սանկցիաների տակ են, և խնդիրները, որոնք գալիս են հայ-ռուսական հարաբերությունների ներկա վիճակից, Տեր-Պետրոսյանը չի շոշափում, որովհետև ինքը կողմնակից է հայ-ռուսական հարաբերություններին, մինչդեռ մեր երկրի, մեր վիճակի ամենամեծ խոչընդոտը հենց հայ-ռուսական հարաբերություններն են, և հիմա սահմանադրական բարեփոխումների մասին խոսելը, կարծում եմ, մի քիչ ադեկվատ չէ»:

Աղասի Ենոքյանի խոսքով՝ առավել լուրջ խնդիրներ կան, և դրանց մասին այսօրվա ոչ իշխանական և իշխանական ուժերը վախենում են խոսել, քանի որ երկուսն էլ միահամուռ կերպով նպաստել են այս իրավիճակին:

«Ժառանգություն» կուսակցության փոխնախագահ Արմեն Մարտիրոսյանը նախ նկատեց, որ սահմանային իրավիճակի մասով, քանի որ նմանատիպ պատասխան գործողությունները հրապարակային չեն լինում, ուստի զերծ կմնա այդ առումով գնահատական տալուց։ «Շատ ժամանակ պատժիչ գործողությունները հրապարակային գործողություններ չեն ենթադրում: Հույս ունեմ, որ այնուամենայնիվ, այդ գործողությունները խիստ են լինում»,– ասաց նա:

Սահմանադրական բարեփոխումների մասով էլ ավելացրեց, թե «Ժառանգությունը» միշտ կողմ է եղել բարեփոխումներին, պառլամենտական հանրապետությանը, բայց ներկա իշխանությունները չէ, որ պետք է սահմանադրական փոփոխություններ իրականացնեն։

«Իշխանություններն իրենց հետագա վերարտադրման խնդիրն են փորձում լուծել, և անիմաստ չէ, որ փորձում են այդ փոփոխություններն անել: Այդ փոփոխություններն իրենց անհրաժեշտ են, սակայն դրանք մեր փոփոխությունենրը չեն, մեր պատկերացրածը չեն»,– ասաց նա:

Արմեն Մարտիրոսյանն անդրադարձավ նաև առաջին նախագահի դիտարկումներին՝ կապված Հայաստանի և Ադրբեջանի նախագահների առաջիկա հնարավոր հանդիպմանը Ֆրանսիայում և ասաց, որ ցանկացած դեպքում հանդիպումներն իրապես որոշակիորեն կարող են լիցքաթափել առկա իրավիճակը։ Ուստի, նա ՀՀ Նախագահի Ֆրանսիա գնալը ճիշտ է համարում. «Իսկ Լևոն Տեր-Պետրոսյանը փորձում է ասել, որ ինչ-որ առարկայական սպասելիքներ պետք չի ունենալ այդ հանդիպումից, դրա համար Արցախի ներկայությունը ևս անհրաժեշտ է, ինչն այս պահին չկա»:

Արմեն Մարտիրոսյանի խոսքով՝ ՀՀ իշխանությունների վարած քաղաքականությունը որոշակի խնդիրներ է առաջացրել Հայաստանի համար։ «Իսկապես Արցախի հետ կապված մենք բավականին բարդ իրավիճակում ենք գտնվում: Բայց ցանկացած պարագայում ելքերը կան, որոնց համար պետք է երկրում արմատական փոփոխություններ իրականացնել»,– ասաց նա:

Առաջին նախագահի դիտարկումների շուրջ փորձեցինք մեկնաբանություններ խնդրել Քաղաքացիական պայմանագրի և Նախախորհրդարանի անդամներից: Քաղաքացիական պայմանագրի կառավարման խորհրդի անդամներ Ալեն Սիմոնյանը և Արայիկ Հարությունյանը հրաժարվեցին մեկնաբանել առաջին նախագահի խոսքերը՝ ասելով, որ իրենք չեն մեկնաբանում Տեր-Պետրոսյանի խոսքերը:

Նախախորհրդարանի նախագահության անդամ Ժիրայր Սեֆիլյանն էլ նպատակահարմար չգտավ այս պահին մեկնաբանություններ անել:

Իրավապաշտպան Արտակ Զեյնալյանը նույնպես զերծ մնաց մեկնաբանել առաջին նախագահին: «Չեմ ցանկանում որևէ գնահատական տալ նրա բոլոր նկատառումներին»,-ասաց Արտակ Զեյնալյանը: