Գյումրիի քաղաքապետ Սամվել Բալասանյանը դուրս է եկել ԲՀԿ-ից

Գյումրիի քաղաքապետ, նախկին ՕԵԿ-ական Սամվել Բալասանյանը հայտարարություն է տարածել «Բարգավաճ Հայաստան» կուսակցությունը լքելու մասին։

Հայտարարության մեջ, մասնավորապես, նշվում է.  «Հաշվի առնելով «Բարգավաճ Հայաստան» կուսակցության ղեկավար Գագիկ Ծառուկյանի՝ քաղաքականությունից դուրս գալու մասին որոշումը, այլևս ոչ մի պարտավորվածություն չեմ տեսնում «Բարգավաճ Հայաստան» կուսակցության նկատմամբ:

Միաժամանակ լինելով ապաքաղաքականացված կառույցի ղեկավար՝ նպատակահարմար չեմ գտնում իմ հետագա անդամակցությունը «Բարգավաճ Հայաստան» կուսակցությանը:

Ուզում եմ մատնանշել հետագա համագործակցության պատրաստակամությունը «Բարգավաճ Հայաստան» կուսակցության և բոլոր քաղաքական ուժերի հետ՝ քաղաքում կուտակված բազմաթիվ խնդիրների լուծման և Գյումրիին նոր կարգավիճակ տալու համար՝ ի շահ Գյումրիի և գյումրեցիների»: