Գեղեցիկ կանայք և ազդեցիկ տղամարդիկ. լուսանկարչության հայ լեգենդ Հովսեփ Քարշը` Time-ի անդրադարձում

23:13 • 19.03.15

Հեղինակավոր Time հանդեսը անդրադարձել է համաշխարհային լուսանկարչության լեգենդ, հայազգի լուսանկարիչ Հովսեփ Քարշին: Վերջինիս աղբյուրը անվանում է «20-րդ դարի մեծագույն պորտրետային լուսանկարիչներից մեկը»:

Աղբյուրը ներկայացնում է Քարշի և Չերչիլի միջև տեղի ունեցած հայտնի դրվագը, երբ լուսանկարիչն ընդամենը մեկ կադր անելու հնարավորություն է ունեցել և պահի տակ, առանց զգուշացնելու, քաշել-հանել է Չերչիլի բերանից իր հանրահայտ սիգարը: Այդպես ստացվել է Չերչիլի ամենահայտնի լուսանկարներից մեկը: 1941-ին արված այդ լուսանկարից էլ սկսվել է Քարշի կարիերան:

1992-ին ասպարեզից հեռանալուց առաջ նա հեղինակել էր 15000 լուսանկար, որոնցից 20-ը հայտնվել էր LIFE հանդեսի շապիկին:

Աղբյուրը նկատում է, որ Քարշի համար թերևս սովորական էր դարձել լուսանկարել Էլիզաբեթ Երկրորդի կամ Հռոմի պապի պես հայտնի դեմքերի: Մեջբերվում է նաև Sunday Times-ի՝ ժամանակին արված դիտարկումը, թե երբ հայտնիները ցանկանում են անմահանալ, նրանք դիմում են Քարշին:

Time-ի ներկայացրած ֆոտոշարքում հոլիվուդյան գեղեցկուհիներն են, ամենաազդեցիկ և ինտելեկտուալ տղամարդիկ:

Ներկայացվում է նաև նրա կյանքի պատմությունը` Հայոց ցեղասպանությունը վերապրելու կտրվածքով: Քարշի ժառանգության համադրող և տնօրեն Ջերի Ֆիդլերը, մասնավորապես, ասում է. «Նա հասակ է առել Հայոց ցեղասպանության շրջանում և ամենավատ բաներն է տեսել կյանքում և այդ պատճառով էլ իսկապես գնահատել է ամենալավը»:

Հետագայում նա Թուրքիայից գաղթել էր Կանադա:

Մուհամեդ Ալին