UWC Դիլիջանի քոլեջում համերգների շարք է մեկնարկում. կայացել է «Մեծ բազար» խմբի համերգը

«Մեծ Բազար» երաժշտական խմբի ելույթով այսօր UWC Դիլիջանի քոլեջում մեկնարկել է համերգների շարքը, որի կազմակերպիչներն են՝ «Հայաստանի զարգացման նախաձեռնություններ» (IDeA) հիմնադրամը և UWC Դիլիջան քոլեջը: Այս նախաձեռնության նպատակն է Դիլիջանը դարձնել մշակութային միջոցառումների անցկացման հետաքրքիր վայր, ինչպես նաև՝ նպաստել քաղաքի մշակութային կյանքի աշխուժացմանը:

Ինչպես հայտնում են «Հայաստանի զարգացման նախաձեռնություններ» (IDeA) հիմնադրամի հանրային կապերի բաժնից՝  «Մեծ Բազար» երաժշտական խմբի համերգի կազմակերպմանն աջակցել է նաև Հայաստանում Ֆրանսիայի դեսպանությունը: Խումբը միավորում է հայ, թուրք, քուրդ և ֆրանսիացի երիտասարդ երաժիշտների, ովքեր համագործակցում են արվեստում և տարբեր ոճերի երաժշտություն են մատուցում:

Համերգն ունկնդրելու հնարավորություն են ունեցել ո՛չ միայն քոլեջի սաները, այլև՝ Դիլիջան քաղաքի կրթական, մշակութային, համայնքային այլ հաստատությունների ներկայացուցիչներ:

«Որպես Դիլիջան քաղաքում խոշոր ծրագրեր իրականացնող կազմակերպություն՝ IDeA հիմնադրամը կարևորում է  քաղաքի մշակութային կյանքում ամբողջական ներգրավվածությունը և  կրթական ու  մշակութային տարբեր միջոցառումների անցկացումը: Համերգների շարքն անցկացվում է ո՛չ միայն քոլեջի ուսանողների, այլև՝ քաղաքի կրթական այլ հաստատությունների ներկայացուցիչների և քաղաքի երիտասարդ բնակիչների համար: Մենք փորձում ենք այնպես անել, որ Դիլիջանը  դառնա նաև տարբեր մշակութային միջոցառումների անցկացման վայր: Այս առումով, բացի համերգներից, տարվա ընթացքում IDeA-ն նաև հետաքրքիր այլ միջոցառումներ, փառատոններ է նախատեսում  կազմակերպել քաղաքում»,-նշել է հիմնադրամի տնօրենի տեղակալ Սերգեյ Թանթուշյանը:

Դպրոցի տնօրեն Ջոն Փադըֆութը նույնպես կարևոր է համարել նման միջոցառումների կազմակերպումը. «Հաճելի է հյուրընկալել մի խմբի, որն աչքի է ընկնում  ազգային և մշակութային բազմազանությամբ և որը փորձում է երաժշտությամբ միավորել այն երկրները, որոնք քաղաքական առումով ոչ միշտ են  գտնվում լավ հարաբերություններում: Սա UWC Դիլիջան քոլեջի առաքելության մի մասն է, և մենք ուրախ ենք, որ տեղի բնակչությունը նույնպես հնարավորություն ունի ներկա գտնվել և վայելել երաժշտական այս միջոցառումը»:

Առաջիկայում  դպրոցում տեղի կունենա նաև հայտնի դաշնակահար Տիգրան Համասյանի համերգը: