Կամերային երաժշտության տանը տեղի կունենա համերգ՝ նվիրված Դիրիժոր Զավեն Վարդանյանի 70-ամյակին

Այս տարի նշվում է տաղանդավոր դիրիժոր, ՀՀ արվեստի վաստակավոր գործիչ,  բազմաթիվ յուրահատուկ երաժշտական  փառատոների հիմնադիր, իր ուրույն  մեկնաբանությունների շնորհիվ  երաժշտասեր   հասարակայնության կողմից  սիրված   Զավեն Վարդանյանի 70-ամյա տարեդարձը:
 

Մարտ 29-ին` ժամը 19:00-ին Կոմիտասի Կամերային Երաժշտության տանը տեղի կունենա Հայաստանի պետական կամերային նվագախմբի և Մենակատարների պետական անսամբլի միասնական հոբելյանական համերգ նվիրված` Զավեն Վարդանյանի 70-ամյակին:

Դիրիժոր  Զավեն Վարդանյանը ծնվել է 1945-ի  հունվարի 15-ին, Սիրիայի Հալեպ քաղաքում:
1947-ին  ընտանիքի հետ հայրենադարձվել է:  1975-ին ավարտել է Երևանի Կոմիտասի անվան պետական կոնսերվատորիայի դիրիժորական ֆակուլտետը: Դիրիժորի կարիերան սկսվել է 1975-ին, երբ հիմնել է Ժամանակակից երաժշտության անսամբլը, որը  ղեկավարել է մինչև 1979-ը:  1979-90թթ.. հիմնել  և  դարձել է Երևանի պետական կամերային նվագախմբի գեղարվեստական ղեկավարն ու գլխավոր դիրիժորը, այնուհետ՝ 1992-1994թթ.. ՝ Կոնսերվատորիայի օպերային ստուդիայի գեղարվեստական ղեկավար և գլխավոր դիրիժոր, 1994-1998թթ.Ա. Սպենդիարյանի անվան օպերայի և բալետի ազգային ակադեմիական թատրոնի դիրիժոր:

2003-07թթ Էկվադորի կառավարության հրավերով աշխատել է տեղի համալսարանում և ղեկավարել այդ երկրի բոլոր 4 սիմֆոնիկ նվագախմբերը: Պարգևատրվել է մի բազմաթիվ մեդալներով, պարգևներով:  2009թ. արժանացել է ՀՀ արվեստի վաստակավոր գործչի կոչմանը:
2008-ից հիմնել և առ այսօր   ղեկավարում է Մենակատարների պետական  անսամբլը: