«Եվրատեսիլի» կազմակերպիչները մեկնաբանել են Չեռնոգորիայի և Մակեդոնիայի որակազրկումը

«Եվրատեսիլ» երաժշտական մրցույթի կազմակերպիչները  մեկնաբանել են, թե ինչու են որակազրկել  Չեռնոգորիային և Մակեդոնիային: Ինչպես գրում  է Lenta.ru-ն` այս մասին տեղեկացրել է «Եվրատեսիլի» Եվրոպական հեռարձակողների միության ներկայացուցիչ Յարմո Սիիմը:

«Պատճառն այն է, որ երկու ժյուրիում էլ խմբի 5 տարբեր անդամի մոտ ցուցանիշները բավականին նման էին, ինչից հետևում է, որ հավանաբար ժյուրիի անդամները  իրենց գնահատականները միմյանցից անկախ չեն տվել, ինչը պահանջվում է` ըստ Եվրոպական հեռարձակողների միության կանոնակարգի», - ասել է Սիիմը:

Եվրոպական հեռարձակողների միությունը խոստացել է մանրամասն ուսումնասիրել և քննարկել ստեղծված իրավիճակը  Չեռնոգորիայի և Մակեդոնիայի հեռարձակողների  ղեկավարության հետ` «հասկանալու համար`  պատահաբա՞ր է այսպես ստացվել, թե՞ կանխամտածված»:

Հիշեցնենք, որ մայիսի 25-ին Եվրոպական հեռարձակողների միությունը անվավեր է ճանաչել Մակեդոնիայի և Չեռնոգորիայի ձայները` մեկնաբանելով, որ երկու երկիրն էլ  ներկայացրել են միայն հեռուստատեսային քվեարկության արդյունքները: