Ծովային կրիաները չեն կարողացել ձվադրել «սելֆիամոլ» զբոսաշրջիկների պատճառով (լուսանկարներ, տեսանյութ)

Կոստա Ռիկայի իշխանությունները հետաքննություն են սկսել մի խումբ զբոսաշրջիկների ու տեղացիների նկատմամբ, ովքեր թույլ չեն տվել վերացման վտանգի տակ գտնվող ծովային կրիաներին դուրս գալ ցամաք ու ձվադրել։

Ինչպես նշում է The Daily Mail-ը, հարյուրավոր հետաքրքրասեր զբոսաշրջիկներ, ինչպես նաև որոշ տեղացիներ «գրոհել» են Ostional Wildlife Refuge ծովափնյա արգելոցը, որտեղ կրիաները ցամաք էին դուրս եկել սերունդը շարունակելու համար։

«Սելֆիամոլ» մարդիկ, տեսնելով օվկիանոսից դանդաղ դեպի ցամաք շարժվող կրիաների մեծ խմբին, կանգնել են նրանց ճանապարհին ու սկսել ինքնամոռաց «սելֆիներ» անել։ Նրանցից որոշները երեխաներին նստեցրել են կրիաների պատյանին ու լուսանկարել նրանց` թույլ չտալով կենդանիներին առաջ շարժվել ու կատարել իրենց կարևոր առաքելությունը։ Մարդիկ վախեցրել են կրիաներին տեսախցիկների չդադարող լուսարձակումներով, ինչպես նաև անընդհատ կենդանիներին դիպչելով։

Այս ամենի հետևանքով կրիաների մեծ մասը ստիպված է եղել օվկիանոս վերադառնալ` առանց ձվադրելու։

Աղբյուրը մանրամասնում է, որ այս արգելոցն աշխարհում կրիաների ձվադրման ամենակարևոր վայրերից մեկն է։

Այժմ իշխանությունները փորձում են պարզել, թե ինչպես են մարդիկ կարողացել ներթափանցել առափնյա հատված` կրիաների համար նման կարևոր ժամանակահատվածում։