Արվեստի գլուխգործոցների գաղտնիքներ, որոնց մասին շատերը չգիտեն (լուսանկարներ)

Կան արվեստի գործեր ու ճարտարապետական գլուխգործոցներ, որոնք բոլորիս հայտնի են մանկությունից, սակայն դրանցից յուրաքանչյուրը մանրակրկիտ վերլուծության ենթարկելուց հետո բազմաթիվ խորհրդավոր ու անհայտ մանրուքներ են բացահայտվում:

 AdMe.ru-ն կիսվել է այն մանրուքներով, որոնք շատերը չեն նկատել:

Էյֆելյան աշտարակի վերևի հարկերի բնակարանը

Էյֆելյան աշտարակը ստեղծած ֆրանսիացի ճարտարապետ և շինարար Գուստավ Էյֆելը դրա վերևի հարկերում բնակարան է կառուցել ու սարքավորել իր համար, որը հաճախ օգտագործել է հանգստի կամ հյուրերի ընդունելության նպատակով: Մի անգամ նա այնտեղ երկար զրույց է ունեցել ամերիկացի գիտնական Թոմաս Էդիսոնի հետ: Բնակարանում խոհանոց, կոյուղի, երկու ննջասենյակ ու հյուրասենյակ կա, որից հիասքանչ տեսարան է բացվում: Այժմ այնտեղ տեղակայված է Էյֆելի ու Էդիսոնի մոմե արձաններով թանգարանը:

Ազատության արձանի ոտքերի մոտ պոկված շղթան

Ֆրանսիայի քաղաքացիներն Ազատության արձանը նվիրել են ԱՄՆ-ին հեղափոխության հարյուրամյակի պատվին: Արձանը խորհրդանշում է ազատություն, ժողովրդավարություն ու ստրկատիրության վերացում, ահա թե ինչու արձանի ոտքերի մոտ պոկված շղթա կա, որը զբոսաշրջիկները սովորաբար չեն նկատում:

Մեծ Սֆինքսի սկզբնական տեսքը

Մեծ Սֆինքսն աշխարհի հնագույն արձանն է: Ի սկզբանե այն պատված է եղել վառ ներկով, որը պահպանվել է միայն մասամբ` արձանի ականջի հետևի հատվածում: Սֆինքսն ի սկզբանե նաև քիթ ու դնովի ծիսական մորուք է ունեցել, որի մասերը կարելի է տեսնել Բրիտանական ու Կահիրեի թանգարաններում:

Կան ենթադրություններ, որոնց համաձայն Սֆինքսն ի սկզբանե առյուծի գլուխ է ունեցել, իսկ այն փոխարինած մարդկային գլուխը քանդակվել է շատ ավելի ուշ, ինչը բացատրում է հսկայական մարմնի ու փոքր գլխի համամասնությունների խախտումը:

Մեծ Բրիտանիայի ամենահայտնի տեսարժան վայրի անվանումը

«Բիգ Բեն» անվանումը վերաբերում է ոչ թե ամբողջ աշտարակին, այլ միայն դրա ներսում գտնվող խոշոր զանգին: Մինչև 2012 թվականի սեպտեմբեր զանգակատան պաշտոնական անվանումը եղել է «Վեսթմինսթերյան պալատի ժամացուցային աշտարակ», իսկ այժմ` «Էլիզաբեթի աշտարակ»:

Մինչ օրս հայտնի չէ, թե ում պատվին է «Բիգ Բեն»-ը ստացել իր անվանումը: Մի տեսության համաձայն` զանգի ձուլման ղեկավարի պատվին, որը խոշոր տղամարդ է եղել ու Big Ben («Մեծ Բեն») մականունն է ունեցել: Մյուս տարբերակի համաձայն` այն անվանվել է գերծանրքաշային կարգում բռնցքամարտի չեմպիոն Բենջամին Քաունթի պատվին:

«Ճիչ» կտավի երկինքը

Նորվեգացի նկարիչ Էդվարդ Մունկի հանրահայտ «Ճիչ» կտավի սկզբնական անվանումը եղել է «Բնության ճիչ»:

«…երկինքն անսպասելիորեն արնակարմիր դարձավ...»,- գրել է նկարիչն իր օրագրում:

2003 թվականին աստղագետների մի խումբ ենթադրություն է արել, որ նկարչի վրա այդպիսի ազդեցություն գործած երկնքի բոսոր գույնն առաջացել է 1883 թվականին Կրակատաու հրաբխի ժայթքման պատճառով: Մթնոլորտ է արտանետվել հսկայական քանակությամբ հրաբխային մոխիր, որի պատճառով հետագա տարիներին ամբողջ աշխարհում գեղեցիկ ու հրավառ մայրամուտներ են եղել: