«Հայկական ներկապնակ» խորագրով փառատոնին կմասնակցեն հայ և չին գեղանկարիչները

ՀՀ մշակույթի նախարարության, Հայաստանի նկարիչների միության, «Փյունիկ» հիմնադրամի աջակցությամբ, «Լոռվա ձոր» հայրենակցական միությունը` ս. թ. հոկտեմբերի 7-17-ը, ՀՀ Լոռու մարզում, «Հայկական ներկապնակ» փառատոնային ծրագրի շրջանակում կանցկացնի հայ-չինական գեղանկարչության փառատոն՝ «Մետաքսի հին ու նոր ճանապարհը» խորագրով: Փառատոնը նվիրվում է Հայաստանի Հանրապետության անկախության 25-ամյակին:

Ինչպես հայտնում են ՀՀ մշակույթի նախարարությունից, փառատոնին մասնակցում են 20 արվեստագետներ. առաջին անգամ չին և հայ նկարիչները հայաստանյան գողտրիկ բնության գրկում, ստեղծագործական համատեղ աշխատանքի շրջանակում միմյանց կփոխանցեն իրենց փորձը և մասնագիտական հմտությունները: Արվեստագետները նոր ստեղծագործություններով հանդես կգան համատեղ ցուցահանդեսով, ինչպես նաև վարպետության դասեր կանցկացնեն մարզի կերպարվեստի դպրոցներում: