Ռուսաստանից արտաքսված բրիտանացի դիվանագետները հեռացել են դեսպանատնից

14:22 • 23.03.18

Բրիտանացի 23 դիվանագետներ ընտանիքների հետ հեռանում են Մոսկվայից, հայտնում է «ՌԻԱ Նովոստի»-ն:

Մեծ Բրիտանիայի դեսպանատան տարածքից դուրս է եկել երեք միկրոավտոբուս: Դիվանագիտական առաքելության մնացած աշխատակիցները՝ մի քանի տասնյակ մարդ, դուրս են եկել բակ և նրանց ճանապարհել ծափահարություններով:

Երեքշաբթի Լոնդոնից հեռացել էին 23 ռուս դիվանագետներ՝ իրենց ընտանիքների հետ:

Օրերս Մեծ Բրիտանիայի վարչապետ Թերեզա Մեյը հայտարարել էր 23 ռուս դիվանագետի արտաքսելու մասին՝ ռուս նախկին լրտես Սերգեյ Սկրիպալի ու նրա դստեր թունավորման առնչությամբ: Նա հայտարարել էր նաև Ռուսաստանի հետ բարձր մակարդակով կնքված պայմանագրերի չեղարկման մասին: Բացի այդ, չեղարկվել է Մեծ Բրիտանիա այցելելու համար Ռուսաստանի արտգործնախարար Սերգեյ Լավրովին ուղարկված հրավերը:

Մեյը նաև հայտնել էր, որ բրիտանացի նախարարները և բարձրաստիճան պաշտոնյաները չեն այցելի Ռուսաստանում կայանալիք Ֆուտբոլի աշխարհի առաջնությանը: 

66-ամյա նախկին լրտես Սերգեյ Սկրիպալը և նրա դուստրը մարտի 4-ին նյարդապարալիտիկ գազի ազդեցության են ենթարկվել անգլիական Սոլսբերի քաղաքի առևտրի կենտրոններից մեկում և անգիտակից վիճակում տեղափոխվել հիվանդանոց։ Նրանք գտնվում են հիվանդանոցում ծայրահեղ ծանր վիճակում:

Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում: