Երկաթուղային տրանսպորտի աշխատակիցների գործադուլի պատճառով Փարիզի մոտակայքում 400 կմ երկարությամբ խցանում է առաջացել
Ավելի քան 400 կմ երկարությամբ խցանում է առաջացել Փարիզի մոտակայքում՝ երկաթուղային տրանսպորտի աշխատակիցների՝ արդեն երկրորդ օրը տևող գործադուլի հետևանքով: Այդ մասին հայտնել է BFM հեռուստաալիքը:
Հեռուստաալիքի տվյալներով՝ Ֆրանսիական երկաթուղիների ազգային ընկերության (SNCF) աշխատակիցները մտադիր չեն դադարեցնել այն: Գործարկվել են TGV արագընթաց գնացքների միայն 10-20 տոկոսը: Բացի այդ, շրջանային գնացքների միայն 50 տոկոսն է աշխատում:
SNCF-ի տվյալներով՝ չորեքշաբթի գործադուլին մասնակցում է երկաթուղային տրանսպորտի աշխատակիցների 34 տոկոսը: Արհմիությունները հայտարարում են, որ SNCF-ի ղեկավարությունը սխալ տվյալներ է ներկայացնում, իրականում մասնակցությունը մոտ 80 տոկոս է կազմում:
Գործադուլը, որը պետք է վերսկսվի հետագայում ամեն երեք օրը մեկ, պետք է շարունակվի մինչև հունիսի վերջ: Գործադուլի մասնակիցները հանդես են գալիս կառավարության նախատեսած ոլորտի բարեփոխումների, այն մրցակցության համար բացելու դեմ, որի հետևանքով զգալիորեն կվատթարանա SNCF-ի, ինչպես և աշխատակիցների պայմանները: Աշխատակիցների հատուկ դժգոհությունն է առաջացնում իշխանությունների ծրագրերը՝ չեղարկել պետական ընկերության աշխատակիցների համար հատուկ կարգավիճակը, որը նրանց հնարավորություն է տալիս օգտվել մի շարք սոցիալական և կենսաթոշակային արտոնություններից:










