Ռուսաստանը ստացել է Սկրիպալի գործով Քիմիական զենքի արգելման կազմակերպության պատասխանները

15:51 • 04.04.18

Ռուսական կողմը ստացել է բրիտանական Սոլսբերի քաղաքում ռուսական հետախուզական վարչության նախկին աշխատակից Սերգեյ Սկրիպալի և նրա դստեր թունավորման հետ կապված և անցած շաբաթ ուղարկված հարցերին Քիմիական զենքի արգելման կազմակերպության պատասխանները: Այդ մասին հայտնում է «ՌԻԱ Նովոստի»-ն՝ վկայակոչելով կազմակերպությունում Ռուսաստանի մշտական ներկայացուցչությանը:

Գործակալության զրուցակիցը հայտնել է, որ դիվանագիտական առաքելությունում սկսել են ուսումնասիրել ստացված փաստաթղթերը:

«Երեկ երեկոյան Քիմիական զենքի արգելման կազմակերպության տեխնիկական քարտուղարությունը դրանք փոխանցել է մշտական ներկայացուցչությանը, ուսումնասիրում ենք»,- ասված է հայտարարությունում:

Նշվում է, որ խոսքը 13 հարցի մասին է, այդ թվում՝ այն մասին, թե ինչ տեսակի օգնություն է Լոնդոնը խնդրել Քիմիական զենքի արգելման կազմակերպության տեխնիկական քարտուղարությունից միջադեպի առնչությամբ:

66-ամյա նախկին լրտես Սերգեյ Սկրիպալը և նրա դուստրը մարտի 4-ին նյարդապարալիտիկ գազի ազդեցության են ենթարկվել անգլիական Սոլսբերի քաղաքի առևտրի կենտրոններից մեկում և անգիտակից վիճակում տեղափոխվել հիվանդանոց։

Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում: