Մոնիթորինգ կանցկացվի, որ առանց այդ էլ եղած «սուղ բյուջեն չմսխեն». «Թրանսփարենսի Ինթերնեշնլ» հակակոռուպցիոն կենտրոնի ծրագրերի ղեկավար (տեսանյութ)

15:12 • 05.04.18

«Թրանսփարենսի Ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանն այսօր հրավիրված ասուլիսին կարևորեց ՀՀ պետական ֆինանսների կառավարման համակարգի 2017-2018թթ. մոնիթորինգի անցկացումը:  

«Գաղափարը ծնվել էր վաղուց, երբ մենք իրականացնում էինք հանրային գնումների մոնիթորինգը, որը մեկ բաղադրիչն էր, կային այլ բաղադրիչներ ևս, և լուրջ կարևորություն է ներկայացնում այն, թե ինչպես են կառավարվում այդ ֆինանսները: Հաջորդ կարևոր պատճառն այն է, որ ԵՄ-ը, որն իր ֆինանսական, տեխնիկական օժանդակությունն է ցույց տալիս ՀՀ-ին, ունի որոշակի նախապայմաններ տարբեր ոլորտներում. դա և՛ հակակոռուպցիոն ոլորտն է, և՛ հանրային կառավարման, և՛ հանրային ֆինանսների ոլորտը, և այդ նախապայմանները, որոնք դրված են, կարևոր էր հասկանալ, թե որքանով են դրանք իրականացվում, ձևակա՞ն են, թե՞ լուրջ»,- ասաց նա:

Ըստ Հոկտանյանի՝ նման միջոցառումները կարևոր են, որպեսզի առանց այդ էլ եղած «սուղ բյուջեն չմսխեն»:

«Կարևոր է, որ ավելորդ ծախսեր չլինեն, և եկամուտները կառավարվեն պատշաճ կերպով,  ինչպես նաև կարևոր է, որ վերահսկվեն, որը պետականորեն երկու օղակով է վերահսկվում՝ Վերաքննիչ պալատի կողմից և օրենսդրական վերահսկողության միջոցով: Հիմա այս մոնիթորինգով կփորձենք հասկանալ, թե ինչպես է իրականացվում այդ վերահսկողությունը»,- ասաց նա:

Վարուժան Հոկտանյանը նշեց, որ բյուջեի մասին տեղեկատվությունը պետք է լինի մատչելի, որ հանրությունը, ՀԿ-ներն ու լրատվամիջոցները կարողանան ավելի հեշտ հասկանալ, թե ինչ է բյուջեն, ինչպես են եկամուտները գալիս բյուջե և ծախսվում: 

«Կառավարման մարմինների աշխատանքը պետք է լինի թափանցիկ, որպեսզի պարզ դառնա, թե ինչու են, օրինակ, այսքան դպրոց կառուցում, ինչու պետք է լինի այսքան պոլիկլինիկա, ի վերջո, ինչ խնդիրներ են դրվելու և լուծվելու բյուջեի օգնությամբ»,- ասաց նա: