Հայոց ցեղասպանության մասին ֆիլմ նկարահանելուց հետո 3 տարի է՝ հայրենիք չեմ մեկնել. թուրք ռեժիսոր Ֆաթիհ Աքըն

Հայոց ցեղասպանության թեմայով հայտնի «Սպի» ֆիլմի թուրք ռեժիսոր Ֆաթիհ Աքընը թուրքական Tuhaf պարբերականին տված հարցազրույցում խոստովանել է, որ Հայոց ցեղասպանության մասին «Սպի» ֆիլմի ստամբուլյան ցուցադրությունից հետո արդեն 3 տարի է, ինչ չի այցելել հայրենիք:

Ըստ Աքընի՝ Հայոց ցեղասպանության մասին ֆիլմ նկարահանած լինելու փաստը պատճառ է դարձել, որ շատերը Թուրքիայում նրան դիտարկեն որպես «ազգի դավաճան»:

«Թուրքիան ծանր ժամանակաշրջան է ապրում, և դա ինձ իրականում մտահոգում է։ Ատելությունը և այլատյացությունը թունավորել են ամբողջ երկիրը։ Դրանք խորը արմատներ են գցել թուրքական հասարակության մեջ: Այսօրվա Թուրքիայից պետք է հեռու մնամ. այս պահին այնտեղ ֆիլմ նկարահանելու մտադրություն չունեմ», - նշել է Աքընը:

Ըստ նրա՝ Թուրքիայում այժմ տիրող իրավիճակը կարելի է բացատրել այսպես. «Նախկինում էլիտար խավը շահագործում էր գավառականներին, հիմա գավառականները, վերցնելով իշխանությունը, վրեժ են լուծում»։