14 երկիր՝ այդ թվում Հայաստանը, աջակցել է «Սկրիպալի գործով» ՌԴ-ի հայտարարությանը

14:17 • 05.04.18

Տասնչորս երկրների ներկայացուցիչներ, որոնք չորեքշաբթի մասնակցել են «Սկրիպալի գործով» Քիմիական զենքի արգելման կազմակերպության գործադիր խորհրդի նիստին, միացել են Ռուսաստանի պատրաստած համատեղ հայտարարությանն այն մասին, որ անհրաժեշտ է «համոզվել, որ այդ խնդիրը լուծում կստանա իրավական շրջանակում», հայտնում է kommersant.ru-ն:


Գործադիր մարմնի կազմի մեջ մտնում է 41 երկրի ներկայացուցիչ:

Հայտարարությանն աջակցել է գործադիր խորհրդի հանդիպման 14 մասնակից՝ ինքը՝ Ռուսաստանը, Բելառուսը, Սիրիան, Ղազախստանը, Հայաստանը, Ադրբեջանը, Իրանը, Վենեսուելան, Ղրղզստանը, Պակիստանը, Տաջիկստանը, Ուզբեկստանը, Նիկարագուան և Կուբան:

Գործադիր խորհրդի նիստը կայացել է չորեքշաբթի, Հաագայում, Ռուսաստանի նախաձեռնությամբ:

«Մենք անհրաժեշտ ենք համարում համոզվել, որ այդ խնդիրը կլուծվի իրավական շրջանակում՝ օգտագործելով Քիմիական զենքի արգելման հռչակագրի ամբողջ պոտենցիալը»,- ասված է Հաագայում ՌԴ դեսպանատան Twitter-ի էջում տեղադրված հայտարարության տեքստում:

66-ամյա նախկին լրտես Սերգեյ Սկրիպալը և նրա դուստրը մարտի 4-ին նյարդապարալիտիկ գազի ազդեցության են ենթարկվել անգլիական Սոլսբերի քաղաքի առևտրի կենտրոններից մեկում և անգիտակից վիճակում տեղափոխվել հիվանդանոց։

Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում: