ՔՊ անդամներն ապրիլի 7-ի գիշերը բերման են ենթարկվել վարչական գույքը վնասելու հիմքով. Էդգար Ջանոյան
«Քաղաքացիական պայմանագիր» կուսակցության անդամներ Մեսրոպ Պապիկյանին ու Նորայր Հայրապետյանին ապրիլի 7-ի գիշերը բերման են ենթարկել,այնուհետև ազատ են արձակվել։
Տեղի ունեցածը պարզաբանելով՝ ՀՀ ոստիկանության ԶԼՄ-ների հետ կապի,լրատվության և վերլուծության բաժնի պետ Էդգար Ջանոյանն ասաց. «Ապրիլի 7-ին՝ ժամը 23։00-ի սահմաններում, երկու քաղաքացի բերվել է ոստիկանության Արաբկիրի բաժին՝ Վարչական օրենսգրքի 53-րդ հոդվածի 2-րդ մասի հիմքով։ Ոստիկանության բաժնում կազմվել է համապատասխան վարչական արձանագրություն, և նրանք բաց են թողնվել»։
Նշենք, որ Վարչական իրավախախտումների մասին օրենսգրքի 53-րդ հոդվածի 2-րդ մասը սահմանում է՝ վարչական գույքը դիտավորությամբ ոչնչացնելը կամ վնասելը, որը մանր չափերի վնաս է պատճառել։ Առաջացնում է տուգանքի նշանակում` սահմանված նվազագույն աշխատավարձի երեսնապատիկից հիսնապատիկի չափով:
Նշենք, որ երեկ «Քաղաքացիական պայմանագիր» կուսակցության վարչության անդամ Ալեն Սիմոնյանը ֆեյսբուքյան իր էջում ուղիղ հեռարձակմամբ հայտնել էր կուսակցության անդամների՝ բերման ենթարկվելու վերաբերյալ:
Նա տեղեկացրել էր, որ կուսակցության անդամները բերման են ենթարկվել հանրահավաքի իրազեկման համար և նախատեսվում է նրանց վարչական պատասխանատվության են ենթարկվել։










