Արևելյան Ղուտայում ազատվել են ահաբեկիչների մոտ պահված բոլոր պատանդները
Սիրիայի Արևելյան Ղուտա նահանգի Դումա քաղաքի բանտերում «Ջեյշ ալ իսլամ» խմբավորման ահաբեկիչների կողմից պատանդ պահվող բոլոր քաղաքացիները ազատ են արձակված, այս մասին հայտնել է սիրիական պետական SANA գործակալությունը:
Նշվում է, որ գերիներն ահաբեկիչների կողմից բանտարկված են մնացել 2013 թվականից ի վեր, երբ հարձակում էր իրականացվել Ադրա ավանի վրա:
Ազատված սիրիացիներին դիմավորել են նրանց հարազատները: Նրանց ազատման ու տեղափոխման գործողությունն իրականացվել է սիրիական բանակի վերահսկողության ներքո:
SANA-ի՝ Դումայում աշխատող թղթակիցը նաև հայտնել է, որ շարունակվում են աշխատանքները «Ջեյշ ալ իսլամ»-ի բոլոր զինյալներին քաղաքից դուրս բերելու և Ջերաբլուս տեղափոխելու ուղղությամբ: Ահաբեկիչները շարունակում են իրենց ետևից այրել ու պայթեցնել զինապահեստներ, ռազմական տեխնիկա և տարբեր փաստաթղթեր:










