Ոստիկանները հարկադրաբար հեռացրել են Երևանում ճանապարհը փակած ցուցարարներին, բայց բերման չեն ենթարկել (թարմացվող)

19:08 • 12.04.18

21։03

Երթի մասնակիցներն իրազեկման երթ անցկացրին Բաղրամյան պողոտայից-Կոմիտաս-Զեյթուն-Ավան, այնուհետև վերադարձան Կենտրոն: Քաղաքացիական ակտիվիստ Դավիթ Սանասարյանը հայտարարեց, որ իրազեկման երթ կանցկացնեն Կենտրոն վարչական շրջանում և այնուհետև, հնարավոր է որոշում կայացնեն դիմավորել Գյումրիից քայլերթով Երևան եկող Նիկոլ Փաշինյանին։

20:41

Երևանի Ֆրանսիայի հրապարակից սկիզբ առած ակցիայի նախաձեռնողների ու մասնակիցների իրազեկման երթը շարունակվում է:

Բաղրամյան պողոտայից երթի մասնակիցները մեքենաներով շարժվեցին դեպի Կասյան փողոց, այնուհետև նաև Կոմիտաս ու Քանաքեռ-Զեյթուն:

Բողոքի ակցիայի մասնակիցներն իրազեկման երթ են անցկացնում ավտոմեքենաներով և քաղաքացիներին հայտնում առաջիկայում իրենց կողմից նախաձեռնած հանրահավաքի տեղի ու ժամի մասին:

Ընթացքում քաղաքացիական ակտիվիստ Դավիթ Հարությունյանը փակեց ճանապարհին տեղակայված արագաչափ-տեսախցիկը, ինչը պարբերաբար արվում է նախաձեռնության անդամների կողմից:



20։11


Ընդդեմ Սերժ Սարգսյանի վարչապետության բողոքի ակցիայի մասնակիցներն իրազեկման երթ էին անցկացնում, այնուհետև հայտարարվեց, որ դիմավորելու են «Ելք» խմբակցության ղեկավար Նիկոլ Փաշինյանին, ով 12 օր է Գյումրից քայլելով հասնում է Երևան:

Ճանապարհային ոստիկանությունը փակեց Բաղրամյան պողոտան: Ճանապարհային ոստիկանության ծառայողների մեքենաները կայանվել են Բաղրամյան պողոտայի սկզբնամասում և կանխում են երթի մասնակիցների առաջընթացը, նշելով, որ երթի մասնակիցները խոչընդոտում են երթևեկությանը:

20։00

Հավաքի մասնակիցներին ոստիկանության ուժերը հեռացրին ճանապարհի երթևեկելի մասից, սակայն նրանք վերադառնում են Մաշտոցի պողոտա՝ Ֆրանսիայի հրապարակին հարող տարածք և նստում են ճանապարհի երթևեկելի մասում: Տեղում է Երևանի փոխոստիկանապետ Վալերի Օսիպյանը, ով ցուցարարներին և տեղում գտնվող անձանց հայտնեց, որ ճանապարհից հեռացված ցուցարարները բերման չեն ենթարկվել, պարզապես հեռացվել են ճանապարհի երթևեկելի մասից:

Երթի մասնակիցները նշեցին, որ իրենց այլ փողոցներ են տեղափոխել, բայց ոստիկանության բաժին չեն տարվել:

Այս պահին Մաշտոցի պողոտայում ևս ճայթռուկներ վառվեցին, ինչպիսիք Ազգային ժողովում վառել են ՔՊ անդամներ, «Ելք» կուսակցության պատգամավորներ Արարատ Միրզոյանն ու Լենա Նազարյանը:

Ընդդեմ Սերժ Սարգսյանի վարչապետության բողոքի ակցիային մասնակցում են « Քաղաքացիական պայմանագիր» կուսակցության անդամները, Երևանի ավագանու անդամ Ալեն Սիմոնյանը, քաղաքացիական ակտիվիստ Դավիթ Սանասարյանը, Սոֆիա Հովսեփյանը, իրավապաշտպան Ավետիք Իշխանյանն է Բաղրամյան պողոտայում և այլ ակտիվիստներ:

19։08


Ոստիկանները հարկադրաբար հեռացրել են Երևանի Մաշտոցի պողոտայի և Ֆրանսիայի հարակից հրապարակի տարածքի երթևեկելի գոտին փակած ցուցարարներին։

Ոստիկանությունը հաղորդագրություն է տարածել, նշելով, որ ՀՀ ոստիկանությունը հավաքի մասնակիցներից պահանջել է դադարեցնել այլ անձանց իրավունքների անհամաչափ սահմանափակումները և կատարել «Հավաքների ազատության մասին» ՀՀ օրենքով սահմանված՝ հավաքի մասնակցի պարտականությունները:

«Հավաքի մասնակիցները հրաժարվել են կատարել ոստիկանության օրինական պահանջները, ուստի, ղեկավարվելով «Հավաքների ազատության մասին» ՀՀ օրենքի 33-րդ հոդվածով, կայացվել է հավաքը դադարեցնելու մասին որոշում: Դրանից հետո հավաքի մասնակիցները հարկադրաբար հեռացվել են հավաքի վայրից ողջամիտ հեռավորության վրա,ոստիկանության մարմին չեն բերվել:

ՀՀ ոստիկանությունն անձանց հավաքի անցկացման վայրից հեռացնելու գործողությունն իրականացրել է կատարելով «Հավաքների ազատության մասին» ՀՀ օրենքի 32-րդ հոդվածի 1-ին մասի 3–րդ կետով նախատեսված իր պարտականությունը, որի համաձայն՝ ոստիկանությունը պարտավոր է հավաքի անցկացման վայրից հեռացնել այն անձանց, ովքեր կոպտորեն խախտում են հավաքի խաղաղ և բնականոն ընթացքը, եթե այլ կերպ հնարավոր չէ ապահովել այն»,–ասված է Ոստիկանության տարածած հաղորդագրության մեջ։

Նշենք, որ այսօր ցուցարարները վրան էին տեղադրել նույն հատվածում, սակայն ոստիկանությունը տարել էր վրանը, ինչից հետո մի խումբ երիտասարդներ նստել են գետնին` փակելով երթևելությունը։

19։00

Երևանում Ֆրանսիայի հրապարակ տանող ճանապարհին մոտ տասը ցուցարար վրան են տեղադրել, այնուհետև ի նշան բողոքի նստել էին ճանապարհի երթևեկելի հատվածում և փակել այն` առաջացնելով խցանում: Ակցիայի մասնակիցները այդկերպ իրենց բողոք են արտահայտում ընդդեմ Սերժ Սարգսյանի վարչապետության:

Նշենք, որ երեկ ՀՀԿ գործադիր մարմնի նիստում վարչապետի ժամանակավոր պաշտոնակատար Կարեն Կարապետյանի կողմից առաջադրվել է Սերժ Սարգսյանի թեկնածությունը և միաձայն ընդունվել: ՀՀ Ազգային ժողովը վարչապետին կընտրի ապրիլի 17-ին` անվանական քվեարկությամբ: