Ազգային ժողովն առաջին ընթերցմամբ ընդունեց նախորդ օրը քննարկված մի շարք օրենքների նախագծեր

10:44 • 12.04.18

Այսօր Ազգային ժողովում առաջին ընթերցմամբ ընդունվեցին «Հայաստանի Հանրապետության Ազգային ժողովի աշխատակարգը հաստատելու մասին» Հայաստանի Հանրապետության Ազգային ժողովի 2016 թվականի դեկտեմբերի 16-ի ԱԺՈ-267-Ն որոշման մեջ փոփոխություններ կատարելու մասին նախագիծը` դեմ՝ 31, կողմ՝ 61 քվեարկությամբ: 

«Առևտրի և ծառայությունների մասին» Հայաստանի Հանրապետության օրենքում փոփոխություն և լրացումներ կատարելու մասին նախագիծը ևս ընդունվեց: Միայն «Ելք» խմբակցությունը դեմ քվեարկեց:

Խորհրդարանն առաջին ընթերցմամբ  ընդունեց նաև Կառավարության կողմից ներկայացված «Դեղերի մասին» Հայաստանի Հանրապետության օրենքում լրացումներ կատարելու մասին» օրենքի նախագիծը:

Մինչ այդ վարման կարգով խոսեց «Ծառուկյան» խմբակցության պատգամավոր Միքայել Մելքումյանը, ով նշեց, թե իրենք կողմ կքվեարկեն՝ պայմանով, որ հիվանդանոցներին իրավունք տրվի միայն այն դեղերը ներմուծելու, որոնք քրոնիկ և դիսպանսեր բուժման ծառայությունների համար են:

«Ելքը»-ից հայտարարեցին, որ կողմ կքվեարկեն, քանի որ կանխատեսվում է, որ դեղերի գինը նվազելու է: «Եվ ընդհանրապես, առողջապահության ինքնարժեքն ընկնելու է»,- ասաց Արտակ Զեյնալյանը: 

Նախագծի հեղինակ Հակոբ Հակոբյանն էլ նշեց, որ մատուցվող ծառայությունները հնարավոր չէ բաժանել դիսպանսերային կամ խրոնիկ հիվանդությունների տեսքի: «Սա առողջապահության համակարգի սկզբունքն է»,- ասաց նա:

Միքայել Մելքումյանը պնդեց, թե ԱԺ նախագահ Արա Բաբլոյանի հետ պայմանավորվածություն ունեն, որ միայն սահմանափակ դեղացանկին է վերաբերելու: «Երկրորդ ընթերցմանը դեմ կլինենք, եթե այդպես չլինի»,- զգուշացրեց նա:

Հարցը դրվեց քվեարկության և առաջին ընթերցմամբ ընդունվեց միաձայն՝ 92 կողմ:

Կառավարության կողմից ներկայացված  «Հայաստանի Հանրապետության և Վերակառուցման և զարգացման միջազգային բանկի միջև «Ոռոգման համակարգերի բարելավման ծրագրի համար լրացուցիչ ֆինանսավորում» վարկային համաձայնագիրը ևս ընդունվեց՝ 62 կողմ, 31 դեմ:

Մինչ այդ Արտակ Զեյնալյանը նշեց, թե «Ելքը» դեմ է քվեարկելու, քանի որ ԱԺ չեն ներկայացվել ծրագիրն ու սխեման, որպեսզի իմանան՝ այդ գումարները ինչի վրա են ծախսվելու: