Այս ոլորտում ՀՀ–ն մեծ ու դեռևս չօգտագործված ներուժ ունի. մեկնարկեց էկոտուրիզմը Հայաստանում խորագրով 3-րդ համաժողովը (տեսանյութ)

12:33 • 14.04.18

Այսօր մեկնարկեց  3-րդ ամենամյա համաժողովը՝ «Էկոտուրիզմ Հայաստանում» խորագրով: Համաժողովի ընթացքում կկայան 20 նիստ, որի ընթացքում 100-ից ավել բանախոսներ կխոսեն Հայաստանում էկոտուրիզմի և համայնքների համաչափ զարգացման մասին: Բացման իրավունքը տրվեց Ամերիկյան համալսարանի նախագահ Արմեն Տեր-Կյուրեղյանին, որը շեշտեց, թե 3-րդ համաժողովը վկայում է, որ նախորդ 2-ի արդյունքները գոհացնող են եղել:

«Սա բացառիկ հարթակ է, որը նպաստում է Հայաստանում էկոտուրիզմի   զարգացմանը՝ առաջարկելով գաղափարերի և փորձի փոխանակում, խթանելով փոքր ձեռնարկությունների դերը և ստեղծելով շահագրգիռ կողմերի ցանց: Ես բավական տպավորված եմ այստեղ ներկայացված տաղավարներով, քանի որ դրանք շատ ավելի լավ են, քան նախորդ տարի»,- ասաց նա՝ հավելելով, որ ՀՀ-ում էկոտուրիզմի զարգացման մեծ հնարավորություն կա:

ՀՀ բնապահպանության նախարարի տեղակալ Խաչիկ Հակոբյան էլ, համաձայնելով Տեր-Կյուրեղյանի հետ, հավելեց, թե այսօր էկոտուրիզմը գտնվում է բնապահպանության նախարարության ուշադրության կենտրոնում: Նրա գնահատմամբ՝ այս ոլորտում ՀՀ–ն մեծ ու դեռևս չօգտագործված ներուժ ունի:

«Մեր կարևորագույն խնդիրն է Հայաստանի բնական էկոհամակարգերում էկոտուրիզմի զարգացման և աջակցման նպաստումը: Նպատակն է բնության հատուկ պահպանվող տարածքներում էկոտուրիզմի ներուժի բացահայտումը, էկոտուրզիմի զարգացման նպատակով պետական քաղաքականության սկզբունքների սահմանումը, մարտահրավերի և խոչընդոտների գնահատումը»,- նշեց  Խաչիկ Հակոբյանը:

Փոխնախարարը նկատեց, որ Հայաստանն առանձնանում է իր բնությամբ և բազմազանությամբ, ինչը մեծ հետաքրքրություն է ներկայացնում զբոսաշրջիկների համար։

«Հայաստանի հատուկ պահպանվող տարածքները, պետական արգելոցները, ազգային պարկերը, բնության հուշարձանները յուրօրինակ են ու գրավիչ էկոտուրիզմի տեսանկյունից ունեն զարգացման մեծ ներուժ»,- շարունակեց Հակոբյանը:

Վերջին շեշտեց, որ այսօր աշխարհում էկոտուրիզմը զարգանում է, գումարներ են ծախսվում բնության հուշարձանների պահպանման համար:

 

 

ՀեղինակԱնի Օհանյան