Հայտնի է Սիրիայի հարցով ՄԱԿ-ի ԱԽ արտահերթ նիստի անցկացման ժամը
ՄԱԿ-ի Անվտանգության խորհուրդը երևանյան ժամանակով ժամը 19:00-ին կանցկացնի հատուկ նիստ՝ ԱՄՆ-ի, Մեծ Բրիտանիայի և Ֆրանսիայի կողմից Սիրիային հարվածելու հարցով։ Այս մասին հայտնում է Reuters-ը՝ դիվանագիտական աղբյուրներին հղումով:
Նշվում է, որ այս հարցի շուրջ նիստ անցկացնելու առաջարկով է հանդես եկել Ռուսաստանը:
ՌԴ արտաքին քաղաքական գերատեսչության մամուլի խոսնակ Մարիա Զախարովան խոստացել է ՄԱԿ-ի ԱԽ-ում ներկայացնել Սիրիայում ԱՄՆ-ի գործողությունների անօրինական լինելն ապացուցող փաստեր:
Մինչդեռ ՌԴ-ում Միացյալ Նահանգների դեսպան Ջոն Հանթսմանը հայտարարել է, որ ավելի վաղ սիրիական Դումա բնակավայրում իրականացված քիմիական հարձակմանն ի պատասխան արված հարվածը հիմնված է քիմհարձակման վերաբերյալ առկա ստույգ փաստերի վրա:
Հիշեցնենք, որ ավելի վաղ ԱՄՆ նախագահ Դոնալդ Թրամփն ուղերձով դիմել է ժողովրդին՝ հայտարարելով Սիրիային ռազմական հարված հասցնելու որոշման մասին:
Ավելի ուշ հարվածներ հասցնելը հաստատել է Մեծ Բրիտանիայի վարչապետ Թերեզա Մեյը, ինչպես նաև՝ Ելիսեյան պալատը։
Հայտնի է, որ Միացյալ Նահանգները, Մեծ Բրիտանիան և Ֆրանսիան Սիրիայի օբյեկտների ուղղությամբ արձակել են ավելի քան 100 թևավոր և «օդ-երկիր» դասի հրթիռ։
ՌԴ ՊՆ-ն հաղորդել է, որ Սիրիայի հակաօդային պաշտպանության համակարգը հակաօդային պայքար է մղել, հրթիռների զգալի մասը ոչնչացվել է թիրախներին հասնելու ընթացքում։
Նշվում է, որ հարվածները հասցվել են ԱՄՆ ռազմածովային ուժերի 2 նավերից՝ Կարմիր ծովի կողմից, Միջերկրական ծովի օդային տարածքում գտնվող մարտավարական ավիացիայից, ինչպես նաև ամերիկյան ռազմավարական B-1B ռմբակոծիչներից՝ Էթ Թանֆ շրջանից։
ՌԴ ՊՆ-ն հայտնել է, որ ապրիլի 14-ին՝ ռուսական ժամանակով ժամը 3.42-ից մինչև 5.10, ԱՄՆ ԶՈՒ օդանավերն ու նավերը, Ֆրանսիայի ու Մեծ Բրիտանիայի հետ համատեղ, հրթիռային հարվածներ են հասցրել Սիրիայի ռազմական ու քաղաքացիական օբյեկտներին։










