Սաուդյան Արաբիայի թագավորը Եմենի տարածքից հրթիռակոծության համար մեղադրել է Իրանին
Սաուդյան Արաբիայի թագավոր Սալման բեն Աբդել Ազիզ Ալ Սաուդն Իրանին է մեղադրել Եմենի տարածքից թագավորության ուղղությամբ արձակվող բալիստիկ հրթիռների համար: Այդ մասին նա հայտարարել է Արաբական պետությունների լիգայի գագաթնաժողովում ունեցած ելույթում, հայտնում է «ՌԻԱ Նովոստի»-ն:
Սաուդացի միապետն իր ելույթի ընթացքում նշել է, որ «Եմենում շարունակվող ճգնաժամի և Եմենի ժողովրդի տանջանքների ամբողջ պատասխանատվությունը իրանամետ «Անսա Ալլա» շարժման վրա է»:
«Եմենի տարածքից արձակվող հրթիռները պատրաստվում են Իրանում»,- հայտարարել է նա:
Եմենում պատերազմող Էր Ռիադի գլխավորած ռազմական կոալիցիան մարտի վերջին հայտարարել է, որ Սաուդյան Արաբիայի ուղղությամբ Եմենից արձակված յոթ հրթիռ է որսացել, որոնցից երեքն ուղղված էին Էր Ռիադին:
Եմենում 2014 թվականից զինված հակամարտություն է ընթանում, որին մի կողմից մասնակցում են «Անսար Ալլա» շարժման հուսիթ ապստամբները, մյուս կողմից՝ կառավարական զորքերը և նախագահ Աբդ Ռաբու Մանսուր Հադիին հավատարիմ աշխարհազորայինները: Վերջիններիս աջակցություն է տրամադրում արաբական կոալիցիան՝ Սաուդյան Արաբիայի գլխավորությամբ:










