Սիրիայի ուղղությամբ նոր հարվածների վերաբերյալ ծրագրեր չկան. Մեծ Բրիտանիայի ԱԳՆ

14:37 • 15.04.18

Մեծ Բրիտանիան իր դաշնակիցների հետ կուսումնասիրի հնարավոր տարբերակները, եթե Սիրիայի նախագահ Բաշար ալ Ասադը կրկին քիմիական զենք օգտագործի սեփական ժողովրդի դեմ, բայց այժմ այդ առնչությամբ որևէ ծրագիր չկա: Այդ մասին հայտարարել է Մեծ Բրիտանիայի արտգործնախարար Բորիս Ջոնսոնը, հաղորդում է Reuters գործակալությունը:

Ջոնսոնը պաշտպանել է վարչապետ Թերեզա Մեյի որոշումը՝ միանալ Սիրիայի ուղղությամբ հարվածներ հասցնելու գործողությանը՝ ասելով, որ դա առաջին բանն էր, որ հարկավոր էր անել հետագայում քիմիական զենքի օգտագործումը կանխելու համար:

«Այժմ սեղանին հետագա հարվածների վերաբերյալ ոչ մի առաջարկ չկա, որովհետև, բարեբախտաբար, Ասադի ռեժիմն այդքան հիմար չէ ևս մի քիմիական հարձակում իրականացնելու համար»,- ասել է նա:

Հիշեցնենք, որ Միացյալ Նահանգները, Մեծ Բրիտանիան և Ֆրանսիան լույս ապրիլի 14-ին Սիրիայի օբյեկտների ուղղությամբ արձակել են ավելի քան 100 թևավոր և «օդ-երկիր» դասի հրթիռ։ 

Նշվում է, որ հարվածները հասցվել են ԱՄՆ ռազմածովային ուժերի 2 նավերից՝ Կարմիր ծովի կողմից, Միջերկրական ծովի օդային տարածքում գտնվող մարտավարական ավիացիայից, ինչպես նաև ամերիկյան ռազմավարական B-1B ռմբակոծիչներից՝ Էթ Թանֆ շրջանից։