Լրագրողների ներկայությունը «Մարիոթում» նշանակում էր, որ բանակցություն չի լինելու, կլինի դիրքերի ամրապնդում. Արթուր Մարտիրոսյան

14:09 • 22.04.18

Բանակցությունների և կոնֆլիկտների կառավարման միջազգային մասնագետ Արթուր Մարտիրոսյանն այսօր անդրադարձել է ՀՀ վարչապետ Սերժ Սարգսյանի և «Քայլ արա» նախաձեռնության ղեկավար, ԱԺ պատգամավոր Նիկոլ Փաշինյանի հանդիպմանը:

Բանակցությունների և կոնֆլիկտների կառավարման միջազգային մասնագետը նշել է, որ դիտել է Երևանի «Մարիոթ» հյուրանոցում Սերժ Սարգսյանի և Նիկոլ Փաշինյանի «երկխոսությունը»:

Արթուր Մարտիրոսյանը, մասնավորապես, գրել է.

«Հնարավոր է դուրս գալ ուլտիմատումային փակուղուց: Միանշանակ: Նույնիսկ երեք րոպեում է հնարավոր թվարկել ելքի ուղիները: Ըստ էության, բանակցություններ «Մարիոթում» չեղան և չէին կարող լինել:

Որպեսզի դա հասկանալի լինի, բավարար է նայել լուսանկարները. լրատվամիջոցների բարձրախոսները սեղանին էին և լրագրողները՝ լսարանում:

Ամենայն հավանականությամբ, նրանց ներկայությունը պահանջել է  Փաշինյանը , որպեսզի չլինի խոսակցություն գաղտնիության մասին կամ ակնարկներ «վաճառվելու» մասին: Սակայն նրանց ներկայությունը նշանակում էր, որ բանակցություն չի լինելու, կլինի դիրքերի ամրապնդում:

Այժմ բանակցություններ հաստատ չեն լինի...

Եթե մինչև առավոտ ես իրավիճակի խաղաղ հանգուցալուծման հույս ունեի, ապա այժմ չունեմ: Այժմ միայն կարելի է աղոթել Աստծուն, որ արյուն չթափվի»: