Իսրայելը մտադիր է է՛լ ավելի ամրապնդել սերտ հարաբերություններն Ադրբեջանի հետ. Նեթանյահու

14:29 • 23.04.18

Իսրայելի վարչապետ Բինյամին Նեթանյահուն շնորհավորել է Ադրբեջանի նախագահ Իլհամ Ալիևին՝ չորրորդ անգամ Ադրբեջանի նախագահի պաշտոնում ընտրվելու կապակցությամբ: Այդ մասին հայտնում է «Թրենդ» գործակալությունը:

«Մտադիր ենք շարունակել կապերն Իսրայելի և Ադրբեջանի միջև բարեկամության և համագործակցության սերտ հարաբերությունների է՛լ ավելի ամրապնդման համար»,- ասված է Իսրայելի վարչապետի հայտարարությունում:

Նա ևս մեկ անգամ առաջարկել է Իլհամ Ալիևին այցելել Իսրայել և հույս է հայտնել նորից տեսնել նրան մոտ ապագայում:


Ադրբեջանի նախագահի արտահերթ ընտրությունները կայացել են ապրիլի 11-ին: Բոլոր ընտրական կետերի տվյալների մշակման արդյունքներով՝ գործող նախագահ Ալիևը հաղթանակ է տարել ընտրողների ձայների 86,02 տոկոսով: 


Հիշեցնենք, որ ԵԱՀԿ դիտորդների հատուկ համակարգող Նիլզա դե Սենան հայտարարել էր, որ Ադրբեջանում նախագահական ընտրություններն անցկացվել են իրավունքների և ազատությունների սահմանափակման պայմաններում՝ անբավարար մրցակցությամբ: