ԱՄՆ իշխանությունները 1 մլրդ դոլարի կոկային և մարիխուանա են առգրավել (լուսանկարներ)
Միացյալ Նահանգների ափային անվտանգության ծառայությունն առգրավել է 1 մլրդ դոլար արժողությամբ տարբեր տեսակի թմրանյութեր՝ ընդհանուր 13 տոննա քաշով:
Ինչպես հայտնում է Daily Mail-ը, ապօրինի բեռն առգրավվել է Մեքսիկայի, Հարավային և Կենտրոնական Ամերիկայի ափերի մոտ: Այնուհետև Ափային անվտանգության ծառայության աշխատակիցները 12 տոննա կոկայինն ու 1 տոննա մարիխուանան տեղափոխել են Ֆլորիդայի «Էվերգլեյդ» նավահանգիստ:
Հայտնի է, որ գործողության իրականացմանն աջակցել են Կանադայի ծովային ուժերը:
Աղբյուրը նկատում է, որ թմրանյութի ոլորտն աշխարհում ամենաեկամտաբերներից մեկն է: Միայն կոկայինի միջոցով նարկոկարտելները տարեկան տասնյակ միլիարդավոր դոլարների եկամուտ են ստանում:
Կոկայինի արտադրության հարցում առաջատար երկրներն են Կոլումբիան, Պերուն և Բոլիվիան:















