Հրազդան գետի ափին տղամարդու դի է հայտնաբերվել. Shamshyan.com
Այսօր՝ ապրիլի 26-ին, արտակարգ դեպք է տեղի ունեցել Երևանում։
Ինչպես հայտնում է shamshyan.com-ը, ժամը 09։15-ի սահմաններում արտակարգ իրավիճակների նախարարության փրկարար ծառայության օպերատիվ կառավարման կենտրոն ահազանգ է ստացվել, որ «Ֆլորենս» ռեստորանային համալիրից դեպի Դավիթաշեն տանող ճանապարհին՝ Հրազդան գետի ափին, տղամարդու դի կա։
Օպերատիվորեն ժամանել է Երևանի 1-03 շտապօգնության թիվ 21 բժիշկների հերթապահ խումբը, որն արձանագրել է, որ տղամարդը մահացած է։
Դեպքի վայր ժամանած ոստիկանները, քննիչներն ու փրկարարները սպասում են, որ ժամանի դատաբժիշկը։ Տեղի ունեցածը դժբախտ դեպք է, հանկարծամահություն, ինքնասպանություն, թե սպանություն՝ պարզ կլինի դատական բժշկի՝ դին զննելուց հետո։ Ոստիկանությունն ու քննչական բաժինը պարզում են մահացածի ինքնությունը։










