Հրվ. Կորեան սահմանից կհեռացնի քարոզչական բարձրախոսները, իսկ Հս. Կորեան կհավասարեցնի ժամային գոտիները
Հարավային Կորեան հայտարարել է, որ Փհենյանի հետ հաշտեցման ուղղությամբ պայմանավորված քայլերի շրջանակում Հյուսիսային Կորեայի հետ սահմանից կհեռացնի քարոզչական տեքստեր հեռարձակող բարձրախոսները, իսկ Փհենյանը համաձայնել է հետ տալ ժամերը՝ Հարավային Կորեայի հետ նույն ժամային գոտում լինելու համար, գրում է Daily Mail-ը:
Հյուսիսային Կորեայի առաջնորդ Կիմ Չեն Ընը նշել է, որ ապրիլի 27-ին Հարավային Կորեայի նախագահ Մուն Չժե Ինի հետ կայացած պատմական հանդիպման ժամանակ ցավալի էր տեսնել երկու ժամացույցներ, որոնք ցույց էին տալիս Փհենյանի և Սեուլի տարբեր ժամերը:
Ինչպես նշում է լրատվամիջոցը, Սեուլի պաշտպանության նախարարությունն արդեն հայտարարել է, որ կհեռացնի սահմանին տեղադրված տասնյակ բարձրախոսները և ակնկալում է, որ նույնը կանի նաև Փհենյանը: Հարավային Կորեան պատմական հանդիպումից առաջ անջատել էր իր բարձրախոսները, իր քարոզչական հեռարձակումներն էր դադարեցրել նաև Հյուսիսային Կորեան:
Ավելի վաղ հաղորդվել է, որ Հյուսիսային և Հարավային Կորեաների առաջնորդներ Կիմ Չեն Ընն ու Մուն Չժե Ինը պատմական հանդիպում են ունեցել երկու պետությունների սահմանագծին՝ լրագրողների առջև իրար ողջունելով ու ձեռք սեղմելով:
Գագաթնաժողովի ընթացքում առաջնորդները համատեղ հայտարարություն են ստորագրել, որտեղ հայտարարել են, որ մտադիր են զինադադարից անցնել խաղաղության պայմանագրի կնքման, ինչպես նաև պայմանավորվել են Կորեական թերակղզու ամբողջական ապամիջուկայնացման անհրաժեշտության մասին:
Կիմ Չեն Ընը դարձել է վերջին 65 տարվա ընթացքում առաջին հյուսիսկորեացի առաջնորդը, որը հատել է սահմանն ու անցել Հարավային Կորեայի տարածք:
Հիշեցնենք, որ թեև Կորեական պատերազմն ավարտվել է 1953թ., այնուհանդերձ, երկու պետությունները շարունակում են տեխնիկապես պատերազմի մեջ մնալ:










