Մոսկվայում սկսվել է Telegram-ի արգելափակման դեմ ցույցը. հավաքվել է ավելի քան 10.000 մարդ (լուսանկարներ, ուղիղ միացում)

16:35 • 30.04.18

Մոսկվայի Սախարովի անվան հրապարակում սկսվել է Telegram հաղորդագրային հավելվածի արգելափակման դեմ ուղղված բողոքի ակցիան, հայտնում է meduza.io:

Աղբյուրը մանրամասնում է, որ ցույցին մասնակցում է ավելի քան 10.000 մարդ: Ի դեպ, ակցիային մասնակցում է հայտնի ընդդիմադիր քաղաքական գործիչ Ալեքսեյ Նավալնին:

Ցույցի կազմակերպիչն է Ռուսաստանի Լիբերտարիանյան կուսակցությունը:

Ավելի վաղ Մոսկվայի Տագանսկի շրջանային դատարանը բավարարել է «Ռոսկոմնադզոր» ծառայության հայցը և վճռել է արգելափակել Ռուսաստանի տարածքում Telegram մեսենջերը: Հայցը ներկայացվել էր ՌԴ անվտանգության դաշնային ծառայությանը ծածկագրման բանալիները փոխանցել հրաժարվելու առնչությամբ: Դատարանը թույլ է տվել անմիջապես արգելափակել Telegram-ը՝ չսպասելով բողոքարկման վերաբերյալ որոշմանը:

ՌԴ նախագահի մամուլի քարտուղար Դմիտրի Պեսկովն ավելի վաղ հայտնել էր, որ նախագահ Վլադիմիր Պուտինը տեղյակ է Telegram մեսենջերի արգելափակման վերաբերյալ դատարանի որոշման մասին: