Մոսկվայում մայիսմեկյան երթին մասնակցել է ավելի քան 130.000 մարդ (լուսանկարներ)
Մոսկվայում ավելի քան 130.000 մարդ մասնակցել է մայիսմեկյան տոնակատարություններին, հայտնում է gazeta.ru-ն՝ Ներքին գործերի նախարարության մայրաքաղաքային վարչությանը հղումով:
Նշվում է, որ Արհմիությունների մոսկովյան ֆեդերացիան մայրաքաղաքի կենտրոնում կազմակերպել է տոնական երթ, որի անվտանգությունն ապահովել են իրավապահ մարմինների ներկայացուցիչները:
Աշխատավորների միջազգային օրը նշվում է մայիսի 1-ին: Պատմության մեջ մայիսի մեկը մտել է 1884 թվականին, երբ ԱՄՆ-ում և Կանադայում կազմակերպվեցին ցույցեր՝ ի պաշտպանություն ութժամյա աշխատանքային օրվա: 1886թ. մայիսի 1-ին բանվորական հուզումներ տեղի ունեցան ԱՄՆ-ի խոշոր արդյունաբերական քաղաք համարվող Չիկագոյում:
Այսօր Աշխատավորների միջազգային օրը նշվում է աշխարհի ավելի քան հարյուր պետություններում: Տոնի առթիվ կազմակերպվող միջոցառումների ընթացքում մեծարվում և գնահատանքի են արժանանում աշխատանքի վետերանները, աշխատավոր դասակարգի ներկայացուցիչները:














