ԱԺ հատուկ նիստը՝ ուղիղ. օրակարգում վարչապետի ընտրության հարցն է (թարմացվում է)

13։16


Հայաստանի վարչապետի ընտրության հարցի քննարկմանը ելույթի խոսք ասաց «Ելք» խմբակցության պատգամավոր Արարատ Միրզոյանը, ով եկել էր մարդկանցով լեցուն Հանրապետության հրապարակի լուսանկարով և ըստ նրա, այդ ժողովրդի վարչապետ Նիկոլ Փաշինյանի նկարով:

«Առաջարկում եմ արձանագրել այս փաստը, դուրս չմնալ համազգային զարթոնքի, նոր Հայաստանի եղբայրության և բարության մթնոլորտից և մաս կազմել այս զարթոնքին՝ կողմ քվեարկելով վարչապետի և ողջ ժողովրդի հաղթանակի օգտին»,-ասաց նա: 


13։11

Նիկոլ Փաշինյանը նշեց, որ վարչապետի պաշտոնում ընտրվելուց հետո իր առաջին գործը լինելու է երկրի բոլոր ոլորտներում բնական կյանքն ապահովելու ուղղությամբ քայլերը: Այսօր, ըստ նրա, ինքը պատրաստվում է երկրի արտաքին վիճակի մասին զեկույցը լսել: Նա շեշտեց, որ երկրում տեղի ունեցած գործողությունները չեն նվազեցրել մեր դիրքերը ճակատում, այլ բարձրացրել են մարտական ոգին:

Նա կարևորեց, որ բյուջեի հավաքագրման և ծախսերը պետք է տեղի ունենան բնականոն ռեժիմով և բոլոր հարկատուներին կոչ արեց պատշաճ կատարել հարկային պարտավորությունները, չխաթարելու համար բնականոն ընթացքը:

Նիկոլ Փաշինյանը հայտարարեց, թե հեղափոխությունն իմաստ չէր ունենաս, եթե յուրաքանչյուրի վարքագծում էական փոփոխություններ տեղի չունենան:




Նա նաև շեշտեց, որ իրենց առաջին անելիքը ԸՕ-ի փոփոխությունն է լինելու, որպեսզի իրոք ազատ և թափանցիկ ընտրություններ անցկացվեն:

«Որևէ կասկած չկա, որ ՀՀ-ի պատմության համար նոր ու փառապանծ էջ է բացվում, վերադարձ հնին այլևս չի լինելու, հուսահատությանը տեղ չի մնալու»,-ասաց նա:

Ելույթից հետո Նիկոլ Փաշինյանին հարցեր ուղղելու համար պատգամավորների կողմից հերթագրվողներ չեղան, ի տարբերություն նախորդ անգամվա, երբ Փաշինյանին հարցեր ուղղելու համար 26 պատգամավոր էր հերթագրվել: 

Ելույթների համար հերթագրվեց 5 պատգամավոր:

13։05

Հայաստանին պետք է այնպիսի տնտեսական զարգացում, որը կունենա նաև դրական սոցիալական ազդեցություն, քանի որ զուտ վիճակագրական տնտեսական աճը որևէ էական բան չի փոխում: 

Այս մասին հայտարարեց ԱԺ «Ելք» խմբակցության ղեկավար, վարչապետի թեկնածու Նիկոլ Փաշինյանն ԱԺ-ում ընթացող վարչապետի ընտրության հարցի քննարկմանը։

Նրա խոսքով՝ Հայաստանին հարկավոր է տնտեսական զարգացման այնպիսի մոդել, որը կփոխի մարդկանց կյանքը՝ դառնալով աղքատության և սոցիալական խնդիրների կրճատման հիմք: Նիկոլ Փաշինյանը շեշտեց, որ պետք է լուրջ աշխատանք տանել, որ ՀՀ բյուջեն մեծանա, ինչը թոշակների և բյուջետային աշխատավարձերի բարձրացման հնարավորություն կտա: Վարչապետի թեկնածուն այս ճանապարհին հասնելու 3 ճանապարհ մատնանշեց: 

«1-ին՝ ՀՀ-ում հեղափոխական տեմպով պետք է զարգանան տեղեկատվական տեխնոլոգիաները, ինչի պոտենցիալն այսօր առկա է մեր երկրում: 2-րդ՝ գյուղատնտեսության զարգացում, այսինքն՝ նոր տեխնոլոգիաները լայնորեն պետք է օգտագործվեն գյուղոլորտում: Որպես ռազմավարական նպատակ է լինելու չմշակվող հողերի մշակումը, իսկ սրան հասնելու համար մենք պետք է բազմաթիվ ջանքեր գործադրենք, խթաններ ստեղծենք, ինչու չէ նաև հարկային արտոնություններ տալով»,- ասաց նա:

Նիկոլ Փաշինյանը կարծում է, որ կառավարությունը պետք քաղաքացիներին վարկային բեռը թուլացնի, հատկապես գյուղատնտեսական, իհարկե բյուջեի և բանկերի, վարկային կազմակերպությունների հետ ինտեսիվ աշխատելու և ընդունելի վնասի շրջանակում: Նա գտնում է, որ անզեն աչքով էլ տեսանելի է, որ գյուղատնտեսական ոլորտն արտահանման մեծ պոտենցիալ ունի, ինչը մինչ այս չի կիրառվել օլիգարխիկ համակարգի պատճառով:

«3-րդ սկզբունքը զբոսաշրջության զարգացումն է, ինչ մեծ հեռանկարների ունի: Վերջին 15 օրերին համաշխարհային մամուլի գլխագրերում ՀՀ-ն, մեր սիրո ու թավշյա հեղափոխությունը ներկայացվել է դրական լուսի ներքո։ Աննախադեպ բարձրացել է ՀՀ-ի և հայ ժողովրդի վարկանիշն աշխարհում: Տարվա 2-րդ կեսին զբոսաշրջության աճը նկատելի կլինի»,-շարունակեց Նիկոլ Փաշինյանը: 

Վերջինս շեշտեց՝ քրեածին ազդեցությունը երկրում պետք է հասցնել ցածր մակարդակի, ինչի բացառիկ հնարավորություն, ըստ Փաշինյանի, առկա է: 

Վարչապետի թեկնածուն զբոսաշրջության զարգացման համար կարևորում է նաև օդային տրանսպորտի գների իջեցումը: Նա ևս մեկ անգամ շեշտեց, որ ՀՀ արտաքին քաղաքականության հիմքում լինելու է Հայաստանի և հայ ժողովրդի հավաքական շահը: Նա վերահաստատեց՝ Հայաստանը շարունակելու է մնալ ԵԱՏՄ անդամ պետություն, ավելին՝ գործադրելու է ջանքեր այդ անդամակցություն արդյունավետ դարձնելու համար:

«ՌԴ-ի հետ ռազմավարական, դաշնակցային հարաբերությունների զարգացումը մեր առաջնահերթություններից է, բայց այն լինելու է իրավահավասարության վրա: ԱՄՆ-ի հետ բարեկամական հարաբերությունները շարունակվելու են, ՀՀ-Իրան, ՀՀ-Վրաստան հարաբերությունների պոտենցիալն օգտագործվելու է։ Կարևորում եմ նաև Չինաստանի հետ հարաբերությունների խորացումը, ինչու չէ՝ նաև Հնդկաստանի»,- ընդգծեց Նիկոլ Փաշինյանը:

Վերջինս նաև շեշտեց, որ ԵԱՀԿ Մինսկի խմբի շրջանակում պատրաստ է բանակցել Ադրբեջանի իշխանության հետ, սակայն կարևորում է Արցախի՝ բանակցային սեղան վերադառնալը: 

Ըստ Փաշինյանի՝ Հայոց ցեղասպանության միջազգային ճանաչումը շարունակելու է մնալ օրակարգում, սակայն վերանայվելու է ոչ կադրային դեսպանների հարցը:  Փաշինյանը վստահեցրեց, որ իր ուշադրության կենտրոնում է լինելու նաև տուգանքների հարցը։ 


 

12։45

Վերջին մեկ ամսում տեղի ունեցած բուռն քաղաքական իրադարձությունների՝ առանց ցնցումների տեղի ունենալը պետական խոհեմության արդյունք է: 

Այս մասին հայտարարեց ԱԺ «Ելք» խմբակցության ղեկավար, վարչապետի թեկնածու Նիկոլ Փաշինյանն ԱԺ-ում ընթացող վարչապետի ընտրության հարցի քննարկմանը։

Փաշինյանը թվարկեց այն ժամանակաշրջանները, երբ երկրում անկայություն է եղել և նշեց, որ հենց այդ փորձությունների միջով անցնելով՝ հանգել են լռելյայն մի համաձայնության, որ վերջ՝ բռնությունն այլևս տեղ չունի ՀՀ ներքաղաքական կյանքում: 

«Ներքաղաքական կյանքում ավտոմատները պետք է լռեն հավիտյան և համախոհության առանցքը պետք է լինի ՀՀ շուրջ հայկական պետականության կայացումն ու հզորացումը»,–ասաց նա և հավելեց, որ հենց սա է լինելու ձևավորվող կառավարության գործառույթը՝ ձևավորել համերաշխության մթնոլորտ, իրավունքի շուրջ ազգային միասնություն։

Նիկոլ Փաշինյանը հայտարարեց. «ՀՀ-ում արտոնյալներ չեն լինելու և վե՛րջ, ընտրությունների արդյունքներն այլևս չեն կեղծվելու և վե՛րջ, մենաշնորհներ այլևս չեն լինելու, յուրաքանչյուրն իր նախընտրած բիզնեսով է զբաղվելու և վե՛րջ:

Իրավունքները պաշտպանված են լինելու և վերջ, երկրից արմատախիլ է արվելու կոռուպցիան և վե՛րջ: Որևէ մեկը թող չկասկածի, որ թեկուզ անցումային շրջանում մեր կառավարությունը շրջադարձային փոփոխություն է իրականացնելու՝ առանց վենդետաների, խստորեն պահպանելով օրինականությունը»,-ասաց նա: 

ՀՀ վարչապետի թեկնածուն հայտարարեց, թե քաղաքական և տնտեսական հետապնդումների էջն այլևս փակված է Հայաստանում: «Հայկական հեղափոխության հիմնական և ամենակարևոր ուղերձը, որին պետք է հավատարիմ մնանք անմնացորդ և մինչև վերջ»,-ասաց նա: 

Նիկոլ Փաշինյանը նշեց, որ այսօր արդեն տասնյակ ուղերձներ են ստանում սփյուռքից, ովքեր հավաստիացնում են, որ կազմ-պատրաստ սպասում են, որ վերադառնան Հայաստան և լծվեն Հայաստանի շենացմանը: Նա նշեց, որ ովքեր դրսում տասնյակ հաջողված բիզնեսներ են դրել, բայց ոչ Հայաստանում՝ հասկանալի պատճառներով, նրանք ևս պետք է ներդրումներ անեն Հայաստանում: 

«Սիրելի հայրենակիցներ ձեր վերադարձի ժամը եկել է: ՀՀ տնտեսական դաշտը սպասում է ձեր ներդրումներին, որը պետք է սկսել անմիջապես և ոչ մի վայրկյան չպետք է հետաձգել, քանի որ Հայաստանի անվտանգության հարցն է»,-ասաց նա: 

Ըստ Փաշինյանի՝ պետք է մեկնարկեի մեծ հայրենադարձի սկիզբը, «արտագաղթի անիվը հետ պտտվի»: «Մեր պատրաստակամությունն ենք հայտնում Սփյուռքի ներկայացուցիչների հետ գործնական քայլեր իրացնելու համար»,-ասաց նա: 

Սփյուռքի ներուժի մասին խոսելով, ըստ Նիկոլ Փաշինյանի՝ չպետք է նսեմացնել հայրենակիցների հնարավորությունները, որոնց տաղանդը, ըստ նրա, բավարար չի օգտագործվում:

«Պետական համակարգում առկա լավագույն ներուժը կօգտագործենք: Պետական համակարգում գործող բոլոր պրոֆեսիոնալների վրա ենք հույս դնում, ովքեր իրեն դիրքին հասել են պրոֆեսիոնալիզմի շնորհիվ: Ազգային այս զարթոնքը, վերածնունդը հնից ազատվելու շանս է տալիս յուրաքանչյուրին, ով պատրաստ է դառնալ ՀՀ նոր քաղաքացի, սպասարկել ՀՀ շահը»,-ասաց նա:

12։30

ԱԺ «Ելք» խմբակցության ղեկավար, վարչապետի թեկնածու Նիկոլ Փաշինյանն իր ելույթն այսօր ԱԺ-ում սկսեց Շուշի ազատագրման 26-րդ տարելիցի շնորհավորանքով: Նա կարևորեց այն, ինչպես ինքը որակեց, որ ժողովրդի թեկնածուի հաղթանակը հենց այսօր է լինելու:

«ՀՀ քաղաքացին և հայ ժողովուրդն այնքան ոգևորված է, որքան Շուշիի ազատագրման օրերին, ՀՀ քաղաքացին և հայ ժողովուրդն առավել քան վստահություն ունի դեպի ՀՀ ապագան, քան երբևէ: 

ՀՀ-ում իրականացված ոչ բռնի ու թավշյա հեղափոխությունը զարմացրել ու հիացրել է ամբողջ աշխարհին, Հայաստանի և հայ ժողովրդի վարկանիշն այսօր ավելի բարձր է, քան երբևէ։ Այսօր Հայաստանի Հանրապետության միջազգային հեղինակություն ավելի ծանրակշիռ է, քան երբևէ, ինչը մենք պետք է ծառայեցնենք ՀՀ շահերին»,-ասաց նա։ 

Նիկոլ Փաշինյանն ԱԺ ամբիոնից դիմեց Արցախի բնակչությանը՝ հայտարարելով, որ ՀՀ-ում «ոչ բռնի ու թավշյա, սիրո հեղափոխությունն ամրապնդելու է Արցախի անվտանգությունը»։ 

«Համոզված եղեք՝ սիրո և համերաշխության հեղափոխությունը ոչ միայն վտանգ չի պարունակում, այլև նոր հնարավորություններ է բացում Արցախի ժողովրդի համար»,-նշեց նա՝ հույս հայտնելով, որ հայ ժողովրդի այսօրվա համախմբվածությունն աշխարհին կստիպի նաև ճանաչել Արցախի անկախությունը։

12:18

Ազգային ժողովի հատուկ նիստում  Հայաստանի վարչապետի միակ թեկնածու Նիկոլ Փաշինյանին  ներկայացրեց «Ելք» խմբակցության պատգամավոր, Քաղաքացիական կուսակցության վարչության անդամ Լենա Նազարյանը, ով կոչ արեց օգտվել այս բացառիկ հնարավորությունից և դեմ չգնալ ՀՀ ժողովրդին:

«ՀՀ քաղաքացիները, ովքեր տարիներ շարունակ իրենց ճնշվածությունը զգացել են միայնակ, դուրս հանեցին փողոց, որը չվերածվեց բռնության, այլ պայքարի ցնծությամբ դարձավ միասին գործելու ոգևորություն»,-ասաց նա և նշեց, որ բոլորի նպատակը՝ ազատ, արդար և երջանիկ Հայաստան ստեղծելն է։

 

11:57


Մեկնարկել է Ազգային ժողովի հատուկ նիստը, որի ժամանակ քննարկվելու է Հայաստանի վարչապետի ընտրության հարցը։ Խորհրդարանի 1/3-ի կողմից Հայաստանի Հանրապետության վարչապետի պաշտոնում առաջադրվել է Նիկոլ Վովայի Փաշինյանը:

100 պատգամավոր է գրացվել, քվորում կա, ԱԺ նախագահ Արա Բաբլոյանը հայտարարեց նիստի մեկնարկի մասին: ԱԺ-ն ծափողջյուններով շնորհավորեց նաև Շուշիի ազատագրամն 26-րդ տարեդարձը:

ԱԺ նիստին լրագրողների համար հատկացված սենյակից հետևում է նաև աշխարհահռչակ ռոք երաժիշտ Սերժ Թանկյանը։

ԱԺ-ում մեծամասնություն կազմող՝ «Հայաստանի Հանրապետական կուսակցություն» խմբակցության ղեկավար Վահրամ Բաղդասարյանը հայտարարել էր, որ ՀՀԿ-ն կօժանդակի բավարար ձայների քանակով, որ ամսի 8-ին Հայաստանն ունենա վարչապետ: 

Իսկ մինչ այդ ՀՀԿ-ն հայտարարություն էր տարածել, ըստ որի՝ Հայաստանի Հանրապետությունը մայիսի 8-ին ունենալու է սահմանադրական ճանապարհով ընտրված վարչապետ: Հայաստանի Հանրապետական կուսակցությունը խորհրդարանի 1/3-ի կողմից առաջադրված թեկնածուին աջակցելու է դառնալ վարչապետ: 

Ըստ ՀՀ Սահմանադրության՝ վարչապետն ընտրվում է ձայների մեծամասնությամբ: 105 պատգամավոր ունեցող խորհրդարանի պարագայում վարչապետ ընտրվելու համար բավարար է 53 ձայնը:

Վարչապետի պաշտոնում առաջադրված միակ թեկնածուն՝ «Ելք» խմբակցության ղեկավար Նիկոլ Փաշինյանը, մայիսի 1-ին Ազգային ժողովում չստացավ բավարար թվով ձայներ․ նրա օգտին քվեարկեց 45, դեմ՝ 56 պատգամավոր: