ԱՄԷ-ն պաշտպանել է Թրամփի՝ Իրանի հետ միջուկային գործարքից դուրս գալու որոշումը

12:30 • 09.05.18

Արաբական Միացյալ Էմիրությունները պաշտպանել է Իրանի հետ միջուկային գործարքից դուրս գալու մասին ԱՄՆ նախագահ Դոնալդ Թրամփի որոշումը, հայտնում է «ՌԻԱ Նովոստի»-ն:

ԱՄԷ արտաքին գործերի և միջազգային համագործակցության հարցերով նախարարությունը նշել է, որ համաձայնագիրը «չի երաշխավորում, որ Իրանն ապագայում միջուկային զենք ձեռք չի բերի», և ողջունել է Թրամփի որդեգրած ռազմավարությունը:

ԱՄԷ-ն նաև կոչ է արել միջազգային հանրությանը և համաձայնագրի անդամ երկրներին հետևել ԱՄՆ նախագահի դիրքորոշմանը՝ «Մերձավոր Արևելքը միջուկային զենքից և զանգվածային ոչնչացման այլ տեսակի զենքերից ազատելու համար»:

Ավելի վաղ հաղորդվել է, որ ԱՄՆ նախագահ Դոնալդ Թրամփը հայտարարել է, որ երկիրը դուրս է գալիս Իրանի միջուկային ծրագրի համաձայնագրից և կրկին պատժամիջոցներ կսահմանի Իրանի դեմ:


Թրամփի հայտարարությունից հետո Իրանի նախագահ Հասան Ռոհանին ԱՄՆ-ն անվանել է երկիր, որը չի կատարում իր պարտավորությունները:


«Այս պահից սկսած իրանական միջուկային ծրագրի շուրջ Համատեղ համապարփակ գործողությունների ծրագիրը գործում է Իրանի և 5 երկրի միջև»,- ասել է Ռոհանին:


Նա նաև նախազգուշացրել է, որ Իրանը կարող է շաբաթների ընթացքում վերսկսել ուրանի հարստացումն՝ «առանց որևէ սահմանափակումների»:


Ֆրանսիայի նախագահ Էմանուել Մակրոնն, իր հերթին, Twitter-ում հայտարարել է, որ Ֆրանսիան, Գերմանիան և Մեծ Բրիտանիան ափսոսում են ԱՄՆ նախագահի որոշման համար: