Մոսկվայի Կարմիր հրապարակում մեկնարկել է Հայրենական մեծ պատերազմում տարած հաղթանակի 73-ամյակին նվիրված ռազմական շքերթը (ուղիղ միացում)
Մոսկվայում՝ Կարմիր հրապարակում, մեկնարկել է Հայրենական մեծ պատերազմում տարած հաղթանակի 73-րդ տարեդարձին նվիրված ռազմական շքերթը։
Ինչպես տեղեկացրել է ՌԴ պաշտպանության նախարարության պաշտոնական կայքը՝ տոնական շքերթի հրամանատարությունը կստանձնի ՌԴ ԶՈւ Ցամաքային զորքերի գլխավոր հրամանատար, գեներալ-գնդապետ Օլեգ Սալյուկովը։
Կարմիր հրապարակում անցկացվող շքերթին մասնակցում է ավելի քան 13.000 զինծառայող, ներգրավված է 159 միավոր ռազմական տեխնիկա և ժամանակակից սպառազինություն, 75 ռազմական ինքնաթիռ և ուղղաթիռ։
Այս տարի շքերթին կցուցադրվեն սպառազինության նորագույն տեսակներ՝ «Корсар» և «Катран» անօդաչու թռչող սարքեր, «Уран-6» և «Уран-9» ռոբոտատեխնիկական համալիրներ, «Тор-М2» զենիթահրթիռային համալիրի մարտական մեքենա։ Կցուցադրվեն նաև «Тигр» մեքենաներ, Т-72БЗ տանկեր, «Мста-С» ինքնագնաց հաուբիցներ, «Ярс» հրթիռային համալիրներ, «Панцирь-Cl» համալիրներ և այլն։
Ընդհանուր առմամբ, ՌԴ տարածքում Հայրենական մեծ պատերազմում տարած հաղթանակի 73-րդ տարեդարձին նվիրված տոնական միջոցառումներին մասնակցելու է ավելի քան 145.000 զինվորական, ներգրավվել է ավելի քան 2.300 միավոր ռազմական տեխնիկա, ինչպես նաև 110 ինքնաթիռ և ուղղաթիռ։
Հիշեցնենք, որ նախօրեին ՌԴ նախագահ Վլադիմիր Պուտինը շնորհավորական ուղերձ է հղել նախկին ԽՍՀՄ անդամ երկրների առաջնորդներին և Ուկրաինայի ու Վրաստանի քաղաքացիներին՝ Հայրենական մեծ պատերազմում տարած հաղթանակի 73-րդ տարեդարձի կապակցությամբ։










