ԱՄՆ նախագահն ու առաջին տիկինը դիմավորել են Հս. Կորեայի իշխանությունների կողմից ազատ արձակված ԱՄՆ երեք քաղաքացիներին (լուսանկարներ, տեսանյութ)
ԱՄՆ նախագահ Դոնալդ Թրամփն ու առաջին տիկին Մելանյա Թրամփը դիմավորել են Հյուսիսային Կորեայի բանտերից ազատ արձակված ու երկիր վերադարձած ԱՄՆ երեք քաղաքացիներին։ ԱՄՆ նախագահը շնորհակալություն է հայտնել Հս. Կորեայի առաջնորդ Կիմ Չեն Ընին: Այդ մասին հայտնում է The Daily Mail-ը:
Ամերիկացիները Հյուսիսային Կորեայում պատիժ էին կրում «պետության դեմ հանցագործությունների» կամ արևմտյան հատուկ ծառայությունների օգտին լրտեսություն անելու մեղադրանքներով:
ԱՄՆ նախագահը և նրա կինը գիշերը ժամանել են Վաշինգտոնի մոտակայքում գտնվող «Էնդրյուս» ավիաբազա՝ ողջունելու Կիմ Դոն Չուլին, Կիմ Հակ Սոնգին և Թոնի Քիմին:
ԱՄՆ նախագահը և նրա կինը մտել են ինքնաթիռ, որով ԱՄՆ են ժամանել Փհենյանից ազատ արձակված ամերիկացիները, և այնուհետև ծափողջույնների ներքո դուրս եկել ինքնաթիռից:
«Նրանք հիանալի մարդիկ են: Անկեղծ ասած՝ մենք չէինք սպասում, որ սա տեղի կունենա, բայց դա եղավ: Շատ կարևոր էր այս մարդկանց ազատելը»,- ասել է Թրամփը՝ հավելելով, որ նրա ամենամեծ ձեռքբերումը կլինի Կորեական թերակղզու ապամիջուկայնացումը:
Ավելի վաղ հաղորդվել է, որ ԱՄՆ պետքարտուղար Մայք Պոմպեոն ժամանել է ԿԺԴՀ՝ ամերիկա-կորեական գագաթնաժողովի նախապատրաստման առնչությամբ հանդիպումներ անցկացնելու նպատակով: Ինչպես «Յոնհապ» գործակալությանը հայտնել էր Հարավային Կորեայի նախագահի վարչակազմում աղբյուրը, ԿԺԴՀ իշխանությունները որոշել են ազատ արձակել ԱՄՆ երեք քաղաքացիների:




















