Ռուսաստանցիների մեծ մասը չի կարծում, որ հայաստանյան իրադարձությունների նման իրադարձություններ կարող են տեղի ունենալ ՌԴ-ում

15:15 • 11.05.18

Ռուսաստանցիների մոտ 60 տոկոսը հետաքրքրվում է հայաստանյան իրադարձություններով. այդ մասին են վկայում Հասարակական կարծիքի ուսումնասիրության համառուսաստանյան կենտրոնի անցկացրած սոցիալական հարցման տվյալները, հաղորդում է interfax.ru-ն:

Հայաստանյան իրադարձություններով հետաքրքրվող ռուսաստանցիների 80 տոկոսը հակված է կարծել, որ Ռուսաստանում նման իրադարձությունները բացառված են:

«Իրավիճակին հետևող ռուսաստանցիների երեք քառորդից ավելին (78%) Ռուսաստանում նմանատիպ իրադարձություններն այժմ անհնար են համարում: Նման բան հավանական է համարում միայն 15 տոկոսը»,- նշված է հարցման արդյունքներում:

Հարցումն անց է կացվել 2018 թվականի մայիսի 7-8-ը՝ 18 տարեկանից բարձր 2000 ռուսաստանցիների շրջանում:

Հայաստանյան իրադարձություններից տեղյակ Ռուսաստանի քաղաքացիների 28 տոկոսը տեղի ունեցողը բնորոշում է որպես «թավշյա հեղափոխություն»:

Հարցման մասնակիցների 47 տոկոսը չի սպասում Մոսկվայի և Երևանի միջև հարաբերությունների վատթարացում:

«Թե արդյոք տեղի ունեցող իրադարձությունները Ռուսաստանի և Հայաստանի հարաբերությունների վրա կանդրադառնա՞ն, թե՞ ոչ և ինչպե՞ս կանդրադառնան՝ մեր համաքաղաքացիների համար վիճելի հարց է. իրադարձություններին հետևող հարցման մասնակիցների 28 տոկոսի կարծիքով՝ փոխհարաբերությունները կվատթարանան, 20 տոկոսը՝ ընդհակառակը, սպասում է բարելավումների, իսկ 27 տոկոսը կարծում է, որ իրավիճակը ոչ մի կերպ չի ազդի երկկողմ կապերի վրա»,- հայտնել են սոցիոլոգները: