Կոլումբիայում ջրհեղեղի պատճառով տարհանվել են հարյուրավոր քաղաքացիներ (տեսանյութ, լուսանկարներ)
Կոլումբիայում Կաուկա գետի վարարման հետևանքով տեղի ունեցած ջրհեղեղից հետո տարհանվել է գետի մոտակայքում բնակվող ավելի քան 600 մարդ, այս մասին հաղորդում է Portafolio պորտալը։
Նախատեսվում է, որ գետը պետք է սնի երկրի կառուցվող խոշորագույն հիդրոէլեկտրակայանը՝ «Իտուանգոն»։
Ըստ տեղի լրատվամիջոցների՝ ջրհեղեղից գլխավորապես տուժել են Անտիոկիա շրջանի Պուերտո-Վալդիվիա գյուղի բնակիչները, գետի ջրերը լցվել են շատերի տները։
Նշվում է նաև, որ զոհեր ու տուժածներ չկան, հասցված վնասը նյութական է։
Որոշ աղբյուրներ հայտնում են, որ ջրհեղեղի հետևանքով ամբողջովին ավերվել է 19 տուն, ինչպես նաև 2 կրթական և 1 բժշկական կենտրոն, մի քանի հետիոտնային կամուրջ։
Չի բացառվում, որ ջրհեղեղի պատճառ են դարձել հիդրոէլեկտրակայանի շինարարության ընթացքում թույլ տրված խախտումները, որոնց պատճառով կառուցվող ՀԷԿ-ի թունելները կարող էին խցանված լինել։
«Իտուանգոն» նախատեսվում է գործարկել արդեն այս տարի։













