ԵԱՏՄ-ի գագաթնաժողովում տեղի կունենա Հայաստանի և Ղրղզստանի նոր ղեկավարների հետ ծանոթությունը. «Независимая газета»
Սոչիում այսօր կայանալու է ԵԱՏՄ անդամ պետությունների ղեկավարների գագաթնաժողովը՝ ՌԴ նախագահ Վլադիմիր Պուտինի նախագահությամբ: Միջոցառման ընթացքում, ինչպես ակնկալում են փորձագետները, ՌԴ նախագահը ներկայացնելու է եվրասիական օրակարգը, ինչպես նաև երկկողմ բանակցություններ է վարելու Հայաստանի, Բելառուսի, Ղազախստանի և Ղրղզստանի ղեկավարների հետ: Միջոցառմանը հրավիրված Մոլդովայի նախագահ Իգոր Դոդոնը հուսով է, որ իր երկիրը ԵԱՏՄ-ում դիտորդի կարգավիճակ կստանա, գրում է «Նեզավիսիմայա գազետա»-ն:
ԵԱՏՄ գագաթնաժողովը, բացի կազմակերպությունում առկա խնդիրների լուծման հնարավորությունից, կարևոր է նաև երկրների ղեկավարների հետ անձնական շփումների տեսանկյունից: Առավել ևս, որ Ղրղզստանում և Հայաստանում փոխվել են ոչ միայն այդ երկրների առաջնորդները, այլև քաղաքական համակարգերը, գրում է լրատվամիջոցը։
«Դա կլինի ՌԴ նախագահի հետ Հայաստանի նոր ղեկավարի առաջին հանդիպումը: Կուսումնասիրվեն այն հայտարարությունները, որոնք (ՀՀ վարչապետ) Նիկոլ Փաշինյանն արել է մինչ իշխանության գալը և իշխանություն գալուց հետո: Դրանք վկայում են այն մասին, որ Ռուսաստանի հետ փոխհարաբերությունները կզարգանան մոտավորապես այն քաղաքականության շրջանակներում, որը եղել է մինչ այժմ: Բայց քաղաքականությունը մարդիկ են անում: Փաշինյանը կփորձի փոխհարաբերություններն այնպիսի հունի մեջ դնել, որի դեպքում հասկանալի կլինի, որ Հայաստանի կողմից լուրջ աշխարհաքաղաքական փոփոխություններ, ըստ երևույթին, չեն լինի: Դա կլինի Հայաստանի վարչապետի հիմնական խնդիրը»,- լրատվամիջոցին հայտնել է Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
Գագաթնաժողովը կարևոր է նաև Ղրղզստանի նոր նախագահ Սոորոնբայ Ժեենբեկովի համար. երկրում իշխանափոխությունից հետո դե ֆակտո տեղի է ունեցել խորհրդարանական հանրապետությունից վերադարձ նախագահականին, և Ժեենբեկովին չնայած աջակցում է ժողովուրդը, սակայն ոչ խորհրդարանը և կառավարությունը, գրում է «Նեզավիսիմայա գազետա»-ն:










