Չորս պայթյուն ինդոնեզական Սուրաբայա քաղաքում 2 օրվա ընթացքում. եկեղեցիների մոտ պայթյուններին հաջորդել է ոստիկանական բաժանմունքի մոտ պայթյունը (տեսանյութ)
Ինդոնեզիայի Սուրաբայա քաղաքում ոստիկանական բաժանմունքի մոտ որոտացած պայթյունի հետևանքով մահացել է առնվազն 7 մարդ, այս մասին հաղորդում է Jakarta Post-ը։
Համացանցում հայտնված տեսանյութում երևում է՝ ինչպես է երկու մոտոցիկլետ մոտենում բաժանմունքին, ինչից հետո դրանցից մեկը պայթում է գործի դրված պայթուցիկ սարքի հետևանքով։
Հայտնի է նաև, որ մի քանի ոստիկան մարմնական վնասվածքներ է ստացել։
Սա արդեն չորրորդ պայթյունն է Սուրաբայա քաղաքում վերջին երկու օրվա ընթացքում։
Նախօրեին եռակի ահաբեկչական հարձակման հետևանքով մահացել է 11 մարդ, կա 40 տուժած։
Առաջին պայթյունը որոտացել էր Սուրբ Մարիամ կաթոլիկ եկեղեցու մոտակայքում, հաջորդ երկու պայթյուններն իրականացվել էին մոտ 5 րոպեի տարբերությամբ՝ Դիպոնեգորո փողոցում գտնվող բողոքական եկեղեցու ու Արջունո փողոցում գտնվող «հիսունականների» եկեղեցու մոտ։
Տեղի ոստիկանապետը նշել էր, որ պայթյուններն իրականացվել են մեկ ընտանիքի 6 անդամների միջոցով՝ մոր, հոր, երկու որդիների և երկու դուստրերի, որոնք անչափահաս են եղել։
Հայրը, մայրը, ինչպես նաև նրանց 18, 16, 12 և 9 տարեկան երեխաները մահապարտներ են եղել, նրանք հարել են «Ջեմաա Անշարութ Դաուլա» ահաբեկչական խմբավորմանը։
Նույն օրը ևս մի պայթյուն էր որոտացել Ինդոնեզիայի Արևելյան Ճավա նահանգի Սիդոարջո քաղաքի բնակելի տներից մեկում, մահացել է 3 մարդ։
CCTV footage shows two individuals on a motorbike detonating a bomb at the gate of #Surabaya police station (Mapolrestabes) at 8.50 a.m. this morning, injuring police officers. pic.twitter.com/UBdurtqT2z
— The Jakarta Globe (@thejakartaglobe) 14 мая 2018 г.










